Այսօր Գերմանիայի կանցլեր Անգելա Մերկելը հանդես է եկել Հունաստանի, Իսպանիայի և Պորտուգալիայի հանդեպ կտրուկ քննադատությամբ: Նրա կարծիքով, Եվրամիության այդ երկրներում քիչ աշխատում են և շատ հանգստանում: Այս մասին հաղորդում է Spiegel Online կայքը:
«Խոսքն այն մասին է, որ մարդիկ Հունաստանում, Իսպանիայում և Պորտուգալիայում թոշակի ավելի շուտ չգնան, քան Գերմանիայի քաղաքացիները», նշել է Մերկելը: «Մենք չենք կարող պարզապես համերաշխ լինել և ասել, որ այս երկրներն ամեն ինչ հին կերպ պետք է անեն… Մենք չենք կարող մեկ արտարժույթ ունենալ պայմանով, որ ինչ-որ մեկն ավելի շատ հանգստյան օրեր ունենա, իսկ մյուսն` ավելի քիչ: Այսպես երկար չի կարող շարունակվել»,- ասել է կանցլերը:
Մերկելի այս հայտարարություններն անմիջապես արժանացել են իր հիմնական հակառակորդների քննադատությանը: Սոցիալիստներն ու կանաչները նրան մեղադրել են պոպուլիզմի մեջ` չառաջարկելով իրական լուծումներ:
Տեղեկացնենք, որ Գերմանիայում և մի շարք այլ երկրներում, որոնք մտնում են եվրագոտու մեջ, մշտապես լուրջ քննարկումներ են լինում այն հարցի շուրջ, թե ինչու են այդ գոտու մի շարք` հիմնականում միջերկրածովյան երկրներում մարդիկ օրվա մեջ ավելի քիչ աշխատում, ավելի շատ հանգստյան օրեր ունենում, ինչպես նաև շուտ գնում թոշակի:
