ԵՄ-ում վերջին մի քանի տարում տեղի է ունեցել զգալի պառակտում մի քանի բլոկների՝ Հյուսիս, Հարավ և Արևելք: Միաժամանակ, ԵՄ ապագայի համար ամենավտանգավորը, պարզվում է, հենց եվրոպական երկրներն են, ինչպիսիք են Լեհաստանը և Հունգարիան, քանի որ հենց այնտեղ են ազգայնականները և պոպուլիստները «մշակութային հակահեղափոխության» կուրս սկսել: Այս մասին գրում է Bloomberg-ի թղթակից Լեոնիդ Բերշիդսկին:
Այդ պառակտումն հատկապես նկատելի է դարձել ԵՄ կազմից դուրս գալու մասին Մեծ Բրիտանիայի հայտարարությունից հետո, գրում է հեղինակը: Առաջին բլոկում են Գերմանիան, Բենիլյուքսի, Սկանդինավիայի և Բալթյան երկրները: Նրանք միավորված են տնտեսական քաղաքականության ընդհանրությամբ, բյուջետային խիստ ծրագրման հավատով և մինչև վերջերս՝ ներգաղթյալների նկատմամբ հարաբերական հանդուրժողականությամբ, «թեև այստեղ էլ արդեն պառակտում է ձևավորվում», հավելում է հոդվածագիրը:
Նա հարավային բլոկի մաս է համարում Հունաստանին, Իսպանիային, Իտալիային, Պորտուգալիային, Կիպրոսին և Մալթային: Այդ կազմավորումը երկար ժամանակ ամորֆ էր մնում, և որոշվում էր միայն տնտեսական խնդիրների ընդհանրությամբ: Հիմա նրանք ավելի կողմ են պարտքային և բյուջետային պարտավորությունների վերաբերյալ ԵՄ կանոնների մեղմացմանը: Այստեղ առաջնորդը, ըստ ամենայնի, կարող է դառնալ Իտալիան կամ Հունաստանը, թեև վերջինում վարչապետ Ալեքսիս Ցիպրասը գնալով ավելի արագորեն է կորցնում բնակչության աջակցությունը:
Ամենահամառը, ըստ հոդվածագրի, արևելյան բլոկն է, որում ընդգրկված են նախկին սոցիալիստական ճամբարի երկրները: Նրանց հանդեպ, գրում է հեղինակը, ԵՄ «հին» անդամները միշտ որոշ ներողամտությոմբ են վերաբերվել Արևմտյան Եվրոպայի ֆոնին նրանց աղքատ տնտեսության պատճառով, իսկ իրենք՝ նոր արևելաեվրոպական գործընկերները, երկար ժամանակ «ամաչկոտ» էին: