Ադրբեջանական Salam News գործակալության փոխանցմամբ, ադրբեջանցի քաղաքագետները մասնակցել են «Հարավային Կովկասի զարգացումներն ու դրանց ազդեցությունը հարևան երկրների վրա» խորագրով կոնֆերանսին:
Քաղաքագետ Ֆիքրեթ Սադիգովը նշել է. «Ներկայումս Հարավային Կովկասում տիրող կայունությունը լոկ արտաքին բնույթ ունի: Իրականում կուլիսների հետևում գործընթացներ են ընթանում: Ադրբեջան են այցելում տարբեր պաշտոնատար անձինք, նախագահներ, համանախագահներ: Սակայն այդ այցերը դուրս չեն գալիս զբոսաշրջային այցելությունների շրջանակներից:
Եթե Հարավային Կովկասի տարածաշրջանը համեմատենք Աֆրիկայի ու Մերձավոր Արևելքի հետ, ապա կարելի է ասել, որ այստեղ հարաբերական կայունություն է տիրում: Միևնույն ժամանակ մեր տարածաշրջանում առկա են բավականաչափ թվով «քողարկված հակամարտություններ»:
Ղարաբաղյան հակամարտության հարցում ես հեռանկար չեմ տեսնում, թե մոտ ժամանակներս այդ խնդիրը կարող է կարգավորվել: Սակայն կա մի իրողություն. Ղարաբաղի անկախության ու Հայաստանի հետ միավորվելու հայկական պլանները «ձախողվել» են:
Ինչ վերաբերում է նրան, որ Վրաստանն Ադրբեջանում հեղաշրջում իրականացնելու պլաններ ունի, ապա հնարավոր է, որ ինչ-որ մեկն այնտեղ այդպիսի պլան է որոճում: Սակայն ես չեմ կարծում, թե պաշտոնական Թբիլիսին որևէ կապ ունի դրա հետ, քանի որ նա կախվածության մեջ է գտնվում Ադրբեջանից»:
