ԱՄՆ Գլենդելի քաղաքապետ Արա Նաջարյանն այսօր Հայաստանում հրավիրված մամուլի ասուլիսի ընթացքում տեղեկացրեց, որ, հանդիպելով մի շարք բարձրաստիճան պաշտոնյաների հետ, քննարկել են Գլենդել-Հայաստան համագործակցության ամրապնդման հարցերը: «Ուրախ եմ, որ ներկայացնում եմ Գլենդելի 220 հազար բնակիչներին և 100 հազար հայերին: Մեր լավագույն բժիշկները Գլենդելում, Լոս Անջելեսում հայեր են: Մենք փորձում ենք ամենաբարձր պաշտոնները զբաղեցնել և ավելի ամրապնդել հայ-ամերիկյան կամուրջները: Իսկ Գլենդելի Մեմորիալ հիվանդանոցի մասնաճյուղի հիմնումը Հայաստանում առաջին քայլն է այդ գործում»,- ասաց Արա Նաջարյանը:
Լրագրողների այն հարցին, թե գո՞հ են իրենք Օբամայից, և արդյոք նա կիրականցնի՞ իր խոստումը Հայոց Ցեղասպանության ճանաչման մասին, Գլենդելի քաղաքապետը պատասխանեց. «Օբաման ընտրվելուց առաջ խոստացավ, որ Ցեղասպանությունը կընդունի, բայց խաբեց մեզ: Հետևաբար, մենք շատ դժգոհ ենք նրանից: Մանավանդ այն հայերն են հիասթափված, որ շատ ջանք թափեցին նրա ընտրվելու գործում: Մենք բոլոր հայերով պետք է հասկանանք, որ Ցեղասպանության ճանաչման հարցը չպետք է կապենք ընտրապայքարի խոստումներին: Իսկ Օբամայի դեպքը լավ օրինակ էր, որ մտավ, շահեց, սակայն հետո միտքը 180 աստիճանով փոխեց: Երբ մարդիկ մտնում են Սպիտակ տուն, ինչ-որ բան է կատարվում. Բուշը, Օբաման իրենց միտքը փոխում են»,- դժգոհեց քաղաքապետը:
Արա Նաջարյանը ասաց, որ 1980 թ. Օբաման իր դասընկերն է եղել: «Նրա ուզած ամեն բանը իրականություն դարձավ: Երանի իմանայի, որ նա նման բարձր պաշտոնների է ձգտում: Կբռնեի նրան և լավ կասեի, թե դու պետք է իմանաս, որ այս Ցեղասպանությունը իրական է: Ափսոս, չարեցի դա: Աստված գիտի, եթե ես կամ մեկ ուրիշ աշակերտ դա աներ, կամ նա լսեր մեր խոսքը, մեր պատմությունը, իր միտքը կփոխեր»,- ափսոսանք հայտնեց Գլենդելի քաղաքապետը: