ԷյԴիՍի-ն և Netnod-ը հայտարարել են i.root-servers.net սերվերի ԷյԴիՍի կենտրոնական հանգույցներից մեկում տեղադրման մասին: Սա առաջին DNS Root սպասարկիչն է Հայաստանում, որը կնպաստի DNS ծառայության հուսալիությանը և պահուստայնության բարձրացմանը Հայաստանում և հարակից շրջաններում ինտերնետից օգտվողների համար:
«Սա ոգևորիչ քայլ է՝ բարելավելու ինտերնետ ծառայությունների որակը Հայաստանում: Մենք ուրախ ենք, որ պետք է աշխատենք այնպիսի հեղինակավոր կազմակերպության հետ, ինչպիսին է Netnod-ը: Դա DNS ոլորտում ամենավստահելի անուններից մեկն է, որն ունի anycasting և DNS գործառույթների մեծ փորձ: Аnycasting-ը այսօր արդեն իսկ կայացած մեթոդն է, որն ուղղված է DNS -ի հուսալիությունը և պահուստայնությունը բարելավելուն: DNS Root սպասարկչի տեղադրումը կարևոր է և օգնում է լուծել Հայաստանում ինտերնետ հասանելիության հարցը:
Սա մի կարևոր քայլ է, որը կնպաստի Հայաստանում և տարածաշրջանում ինտերնետ-ենթակառուցվածքի զարգացմանը: Մենք ակնկալում ենք նորանոր նմանատիպ ծառայությունների տեղադրում մոտակա ամիսներին»,- ասում է ԷյԴիՍի-ի տեխնիկական տնօրեն Վահե Խաչիկյանը։
«Մենք ոգևորված ենք i.root-servers.net Հայաստանում տեղադրելուց»,- ասում է Կուրտ Էրիկ Լինդքվիստը՝ Netnod -ի գործադիր տնօրենը: «Այս սերվերը ոչ միայն կօգնի Հայաստանի, այլև հարակից շրջանների՝ ինտերնետից օգտվող հասարակությանը այն տեսանկյունից, որ հնարավոր կլինի բարձրացնել DNS ծառայությունների արագագործությունը և պահուստայնությունը ողջ տարածաշրջանում: Այս սպասարկչի տեղադրումը Netnod-ի հետևողական քայլերից է, որը նպաստում է i.root.-servers.net սպասարկիչների քանակը բարձրացնելուն, ինչը և նպաստում է DNS Root սերվերների գործունեությանն ու կայունությանը ամբողջ աշխարհում»:
Root սերվերները Ինտերնետ DNS համակարգի կարևոր մասերից են, որոնք տեղեկատվություն են ապահովում բարձրագույն մակարդակի անվանական տիրույթների (TLD) սպասարկիչների մասին (օրինակ՝ .am, .com, .org, .info, .ru )։ Համակարգիչները այս տեղեկատվությունն օգտագործում են վեբ հասցեները, էլ. փոստերը գտնելու և այլ տեսակի ինտերնետային գործառույթներ իրականացնելու համար:
Նշենք, որ Netnod-ը կառավարում է վեց ինտերնետ փոխանակման հանգույցներ (IXP) Շվեդիայի հինգ քաղաքներում:
