ՀՀ պետական բյուջեի կատարողականի հաշվետվության ժամանակ ԲՀԿ-ական Գոհար Ենոքյանը ՊԵԿ նախագահի տեղակալ Արմեն Ալավերդյանին հարց տվեց հայաստանյան բիզնեսը Վրաստան տեղափոխելու վերաբերյալ:
Ալավերդյանը հայտարարեց, որ այս հարցը քննարկվել է Սերժ Սարգսյանի` ագրոարդյունաբերության ոլորտի աշխատողների հետ հանդիպման ժամանակ: Ու երբ ՊԵԿ-ի ներկայացուցիչն այդ քննարկման ժամանակ հարցրել է, թե ում է հայտնի կոնկրետ ոլորտում` հյուրանոցային, այս կամ այն արտադրության, ծառայության, կոնկրետ ներդրման դեպք, ապա ոչ մեկը որևէ կոնկրետ օրինակ չի բերել: Ըստ Ալավերդյանի` ՊԵԿ տեղեկություններով, հայ գործարարներն էական ներդրումներ չեն արել նաև Բաթումում հյուրանոցային համալիրների շինարարության և բնակարանաշինության ոլորտում: «Ես մի օրինակ բերեմ` վրացիները Հայաստանում լիմոնադ են արտադրում` «Կազբեկ», «Նատախտարի» ջրեր: Հիմա դա ուրախալի է, մրցակցություն է, որ մենք մեր զովացուցիչ ջրերի մակարդակը բարձրացնենք: Բայց մենք ի՞նչ մրցունակ ապրանք ունենք, որ տանենք Վրաստանում տեղադրենք,- հարցրեց Ալավերդյանը և ինքն էլ պատասխանեց,- բիզնեսի տեղափոխման համար մեկ հիմնական պայման է պետք. երբ հայ գործարարը Հայաստանում պահանջարկի հարցը լուծել է և տեղափոխվում է նոր շուկաներ»: Ալավերդյանը, հերքելով հայկական բիզնեսը Վրաստան տեղափոխելու լուրերը, նշեց. «Խիստ չափազանցված ու գերագնահատված են այն գնահատականները, թե Հայաստանի բիզնեսը տեղափոխվել է»:
ԲՀԿ-ական Գոհար Ենոքյանին ուրախացրին Ալավերդյանի խոսքերը, նա կոչ արեց այդ մասին քարոզել լրատվամիջոցներով: «Որպեսզի մարդիկ իմանան, որ «չոտկի ա»,- եզրափակեց Ենոքյանը: