Երկար դարեր մարդիկ երազել են հասկանալ կենդանիների լեզուն, ինչը թույլ կտար շփում հաստատել նրանց հետ:
Ամերիկյան գիտնականների կողմից ստեղծված Wild Dolphin Project ծրագիրը մեկ քայլով առաջ է մղում մարդկությանն իր այս ցանկությունն իրականացնելու մեջ: Այս ծրագրի հիմնական նպատակներից է ստորջրյա համակարգչի ստեղծումը, որն ընդունակ կլինի ճանաչորոշել դելֆինների կողմից արձակվող ձայները և պատասխանել նրանց անմիջականորեն:
Դելֆինների «խոսքի» օրինակները վերցնելու համար օգտագործվում են ստորջրյա ձայնագրիչներ` հիդրոֆոններ, իսկ ձայնի աղբյուրի վրա ուղղության ընտրությունը կատարվում է լուսադիոդների օգնությամբ: Ձայնի ֆիքսման պարագայում սուզազգեստով օպերատորը կարող է արտաբերել առայժմ ծանոթ ութ բառերից մեկը և սպասել ծովային կենդանիների արձագանքին:
Հետազոտական խմբի ղեկավար, բժիշկ Դենիզ Հերցինգը մանրամասնում է, որ շփման հետևանքով ձեռք կբերվի կենդանիների կողմից արձակվող «խոսքի» ձայնադարան։ Դրա հիման վրա էլ հետագայում կստեղծվի դելֆինների՝ այսպես կոչված այբուբեն, որից հետո կստեղծվի ընդհանուր լեզու, որը հասկանալի կլինի երկու կողմին էլ:
Այս հետազոտության դաշտային փորձարկումները մոտ ժամանակներս տեղի կունենան Ֆլորիդայի ափամերձ շրջաններում: