Հայաստանի էկոնոմիկայի նախարար Արծվիկ Մինասյանը սեպտեմբերի 1-ին հայտարարել է, որ Հայաստանում գործող օրենսդրությունը թույլ չի տալիս լիարժեք պայքարել մենաշնորհների դեմ: Դա հնչել է Երևանի պետական համալսարանում՝ սեպտեմբերի 1-ի կապակցությամբ: Խիստ խորհրդանշական է՝ այն իմաստով, որ Հայաստանի կառավարությունը ձեռնամուխ է եղել Հայաստանում մենաշնորհների և օլիգոպոլիաների հիմնարար, խորքային լեգիտիմացման, իսկ դա նշանակում է, որ այդ գործընթացի մեջ պետք է ներառվի նաև, բնականաբար, կրթական համակարգը և առաջին հերթին, իհարկե, Մայր բուհը:
Մայիսի 12-ին հնչեց վարչապետ Հովիկ Աբրահամյանի հայտնի ելույթը՝ մենաշնորհների և օլիգոպոլիաների դեմ պայքարի մասին: Սակայն, ինչպես հետո պարզվեց, այդ ելույթի իմաստը ոչ թե պայքարն էր, այլ պայքարի գիտակցման խորքային նենգափոխումն ու այդպիսով մենաշնորհների լեգիտիմացիան: Արծվիկ Մինասյանի նախարարությունը հանձնարարություն ստացավ ուսումնասիրելու մոնոպոլիաները: Բնականաբար, ուսումնասիրությունների արդյունքում պարզվեց, որ այդպիսիք չկան: Համենայնդեպս, Հովիկ Աբրահամյանը մի քանի ամիս անց հենց այդպես էլ հայտարարեց, որ մի շարք շուկաների վերաբերյալ հասարակության կարծիքը, թե՝ կան մենաշնորհներ, չի համապատասխանում իրականությանը:
Իհարկե, կառավարությունը մի փոքր հակասականության մեջ հայտնվեց, որովհետև եթե մենաշնորհներ չկան, ապա էլ ի՞նչ պայքարի և դրան օրենսդրության ի՞նչ խոչընդոտի կամ անբավարարության մասին է խոսքը: Սակայն հակասականությունն, իհարկե, անխուսափելի է, երբ մենաշնորհների և օլիգոպոլիաների բեռի տակ ճռռացող տնտեսության և պետականության պարագայում իշխանությունը ստանձնում է դրանց լեգիտիմացման բարդ առաքելությունը: Իսկ Հովիկ Աբրահամյանի կառավարության նպատակը դա է եղել ի սկզբանե, այլապես խոշոր կապիտալը, մենաշնորհատերերն ու օլիգոպոլիաների բաժնետերերը չէին նպաստի կառավարության փոփոխությանն ու Աբրահամյանին որպես իրենց գլխավոր հովանի չէին բերի կառավարության ղեկավարի կարգավիճակին՝ հեռացնելով Տիգրան Սարգսյանին, որը, իհարկե, ըստ էության ոչնչով չէր վնասում նրանց, սակայն նյարդայնացնում էր՝ անընդհատ խոսելով օլիգոպոլիաների և մոնոպոլիաների դեմ:
Այժմ Հովիկ Աբրահամյանը ձեռնամուխ է եղել այդ երևույթների լեգիտիմացմանը, քանի որ առաջիկա խորհրդարանական ընտրություններում դրանք են լինելու Աբրահամյանի քաղաքական հենարանը՝ այն պարագայում, երբ Սերժ Սարգսյանի հենարանը լինելու են իրավապահները:
Եվ պատահական չէ, որ Աբրահամյանին այդ հարցում աջակցում է նաև կոալիցիա մտած ՀՅԴ-ն, քանի որ վերջին շրջանի մի շարք իրադարձություններ ՀՅԴ-ին դե ֆակտո դուրս են դրել Սերժ Սարգսյանի հետ կոալիցիայից, և Դաշնակցությունը ներկայումս առնվազն փորձում է մանևրել Սարգսյանի և Աբրահամյանի միջև՝ խաղից լիովին դուրս չմնալու համար:
Այդ պատճառով էլ դաշնակցական նախարար Մինասյանը, որ կառավարության խիստ քննադատներից մեկն էր, մենաշնորհների համար պատասխանատվությունը կառավարությունից տեղափոխում է խորհրդարան:
