Բրիտանական Daily Express պարբերականի փոխանցմամբ` ԴԱԻՇ ահաբեկչական խմբավորման զինյալները Հռոմի պապ Ֆրանցիսկոսին անվանել են «անհավատ» և հայտարարել, որ նա հանդիսանում է իրենց թիվ մեկ թշնամին: Այդ մասին հաղորդվում է ծայրահեղականների Dabiq ամսագրում:
«Մենք քեզ ատում ենք, քանի որ դու չես հավատում Ալլահին: Մենք քեզ ատում ենք այն բանի համար, որ աշխարհիկ և լիբերալ հասարակությունը թույլ է տալիս այն, ինչ Ալլահը արգելում է»,- ասված է ծայրահեղականների ուղերձում:
Մասնավորապես զինյալները 79-ամյա պապին մեղադրում են, որ նա աջակցում է ԼԳԲՏ հասարակության ներկայացուցիչներին:
Ինչպես նշում է բրիտանական պարբերականը, ավելի վաղ ԴԱԻՇ-ը հրապարակել էր տեսանյութ, որտեղ պատմվում էր Վատիկանի վրա հարձակման և պապի սպանության կոնկրետ պլանների մասին: Թե երբ է համացանցում հայտնվել այդ հոլովակը, պարբերականը չի ճշտում:
Վատիկանի պաշտոնական ներկայացուցիչը նշել է, որ պապը չի վախենում ծայրահեղականների սպառնալիքներից:
