Ինչպես տեղեկացնում են ադրբեջանական գործակալությունները, Բաքվի հեռուստաաշտարակի մերձակայքում հայտնաբերվել է մինչեւ հազար միավոր զինամթերք: Այդ մասին այսօր լրագրողներին հայտնել է Ականազերծման ազգային գործակալության տնօրեն Նազիմ Իսմայլովը: Ներկայում հեռուստաաշտարակի մոտ աշխատում է գործակալության օպերատիվ խումբը մյուս կառույցների ներկայացուցիչների հետ համատեղ: Զինամթերքից մի քանիսը մարտագլխիկներ ունեն:
Դրանց թվում կան տարբեր տրամաչափի զինամթերք, ներառյալ NURS տիպի հրթիռներ, որոնք նախատեսված են ուղղաթիռներ հարվածելու համար: Գործակալության տնօրենը հայտնել է, որ հետաքննությունը կշարունակվի մեկ շաբաթ, զինամթերքի մի մասը կոչնչացվի գործակալության զինափորձարանում, մի մասն էլ՝ հենց տեղում: Իսմայլովը նաեւ նշել է, որ հետաքննություն է կատարվում՝ պարզելու, թե ովքեր են զինամթերքը դրել այդ տարածքում: