Հռոմի պապ Ֆրանցիսկոսը 2014 թ. նոյեմբերին Թուրքիա կայցելի: Դա կլինի պատասխան այցը Կոստանդնուպոլսի Տիեզերական պատրիարք Բարդուղիմեոսին, ով մասնակցում էր քահանայապետի գահակալման արարողությանը Վատիկանում՝ այս տարվա մարտին: Այս մասին հաղորդում է թուրքական անգլալեզու Today’s Zaman թերթը:
Վատիկան այցից հետո Բարդուղիմեոս 1-ին պատրիարքը նշել է, որ Հռոմի պապը կցանկանար Թուրքիա այցելել՝ «արևելյան և արևմտյան քրիստոնյաների միջև երկխոսությանը նպաստելու համար»:
Պարբերականը գրում է, որ քահանայապետի՝ Ստամբուլ այցի հավանական ժամկետը նոյեմբերի 30-ն է, երբ քրիստոնյաները հարգում են Անդրեաս առաքյալի հիշատակը, ով Կոստանդնուպոլսի պատրիարքի հովանավորն է համարվում: Հենց այդ օրը 2 նախկին քահանայապետերը՝ Հովհաննես Պողոս 2-րդը՝ 1979 թ. և Բենեդիկտոս 16-րդը՝ 2006 թ. պատարագի են մասնակցել, որոնք իրենց նստավայրերում իրականացրել են Տիեզերական պատրիարքները:
