Ինչպես հայտնում է Reuters գործակալությունը, Ուսամա բեն Լադենի ոչնչացումից հետո «Ալ-Քաիդա» ահաբեկչական խմբավորման օպերատիվ և ռազմական ղեկավարությունն անցել է եգիպտահպատակ Սայֆ ալ-Ադելին:
Այսպիսի տեղեկություններ կան այն զեկույցի մեջ, որը պատրաստել է Բեն Լադենի նախկին համախոհ Նուման Բենոտմանը, որը հիմա համագործակցում է ամերիկյան հատուկ ծառայությունների հետ: Բենոտմանն իր հերթին հղում է անում «Ալ-Քաիդային» մոտ կանգնած իր աղբյուրներին:
Չի բացառվում, որ հետագայում «Ալ-Քաիդայի» ղեկավարումը կստանձնի Այման Ալ-Զավահիրին, որը համարվում էր երկրորդ մարդը խմբավորման մեջ: Ավելի վաղ կարծիք կար, որ նա կդառնա Բեն Լադենի լիակատար ժառանգը: Բենոտմանը պնդում է, որ Ալ-Ադելին ժամանակավոր կառավարում տրամադրելը կապված է այն բանի հետ, որ այդ խմբավորման անդամներն անհամբեր սպասում էին նոր առաջնորդի, և խմբավորման ապագան մտահոգում էր նրանց:
Սայֆ ալ-Ադելը ՀԴԾ- կողմից ամենաշատ որոնվող ահաբեկիչների ցուցակում է: Հայտնի է, որ նա առնչություն ունի «Եգիպտական իսլամական ջիհադ» կազմակերպության հետ: Նրան կասկածում են 1998 թ. Քենիայում և Տանզանիայում ամերիկյան դեսպանատների պայթեցման մեջ: Նրան հայտնաբերելու մասին տեղեկություններ հայտնողը կարժանանա 5 մլն դոլարի պարգևատրության:
Հիշեցնենք, որ Ուսամա բեն Լադենը ամերիկյան հատուկ ծառայությունների կողմից ոչնչացվել է 2011 թ. մայիսի 1-ին:
