ԱՄՆ-ը եւ Չինաստանը տնտեսական հարցերի քննարկումներում շարժվել են մեռյալ կետից, այս մասին այսօր Հարավային Կորեայի մայրաքաղաքում բացված G20-ի գագաթնաժողովի նախաշեմին հայտարարել է ԱՄՆ նախագահ Բարաք Օբաման: «Մենք՝ որպես աշխարհի առաջատար տնտեսություն ունեցող երկրներ, առանձնահատուկ պարտավորություններ ունենք, որոնք անհրաժեշտ է կատարել ամուր տնտեսական հաշվեկշիռը եւ կայուն տնտեսական աճը պահպանելու համար»,- ընդգծել է ԱՄՆ ղեկավարը: «Կարծում եմ, որ ամերիկա-չինական հարաբերությունները վերջին մի քանի տարվա ընթացքում ավելի են ամրապնդվել՝ կապված այն բանի հետ, որ մենք քննարկում ենք մի ամբողջ շարք ոչ միայն երկկողմ, այլեւ համաշխարհային հիմնախնդիրներ»: Իր կողմից ՉԺՀ նախագահ Հու Ցզինթաոն նշել է, որ «չինական կողմը պատրաստ է ամերիկյան կողմի հետ աշխատել երկխոսության, առեւտրի ու համագործակցության ընդլայնման հարցերի շուրջ այնպես, որ չին-ամերիկյան հարաբերությունները զարգանան դրական ոգով»: