Այսօր Արթիկում բացվեց Հայ ազգային կոնգրեսի գրասենյակը: Միջոցառմանը մասնակցելու նպատակով Արթիկ էին ժամանել ՀԱԿ համակարգող Լևոն Զուրաբյանը, ՀՀՇ վարչության նախագահ Արամ Մանուկյանը, ՀԱԿ ներկայացուցիչներ և նախկին քաղբանտարկյալներ` Մյասնիկ Մալխասյանը, Հարություն Ուռուտյանը, Աշոտ Զաքարյանը, «Ժողովրդավարական հայրենիք» կուսակցության նախագահ Պետրոս Մակեյանը, ՀԺԿ վարչության քարտուղար Ստեփան Մինասյանը, նախկին քաղաքապետ` Վահագն Խաչատրյանը:
Նորաբաց գրասենյակի բացումից հետո Կոնգրեսի ներկայացուցիչները հանդիպեցին Արթիկի ՀԱԿ ակտիվիստների և համակիրների հետ: Հանդիպմանը ելույթ ունեցան Լևոն Զուրաբյանը, Արամ Մանուկյանը, Մյասնիկ Մալխասյանը, Ստեփան Մինասյանը:
Լևոն Զուրաբյանը տեղեկացրեց, որ վերջին 3 տարվա ընթացքում ՀԱԿ-ն ամբողջ հանրապետությունում`40 շրջաններից 30-ում արդեն բացել է շտաբ, գումարած 10-ը` մայրաքաղաքում, Դավիթաշեն համայնքում շուտով կբացվի գրասենյակ, ինչպես նաեւ` Դիլիջանում և Նոյեմբերյանում:
«Ժողովրդի պահանջը արտահերթ ընտրություններ են: Մենք որևէ այլ բան չունենք խոսելու իշխանությունների հետ: Մեզ պետք է Հայաստանում ձևավորել լեգիտիմ իշխանություն, մեզ պետք է, որպեսզի վստահ լինենք, որ ընտրությունները կլինեն արդար: Մենք իշխանությունների հետ բանակցելու ենք սրա շուրջ: Եթե ժողովուրդը տեսնի լուծում չկա թեկուզ երկխոսության միջոցով` հասարակության դժգոհությունը, զայրույթը այլ ձևեր է ընդունելու: Դրա համար իշխանությունները պետք է հասկանան` եթե մտել են գործընթացի մեջ, ուրեմն պետք է գնան երկխոսության, որի ընթացքում մենք կտեսնենք` կամ իրենք անում են ինչ-որ քայլեր, գնում են ինչ-որ զիջումների, որոնք մենք կներկայացնենք ժողովրդին, կտեսնենք` ժողովուրդը համաձա՞յն է, որ օրինակ` այս ժամկետներում անցկացվեն ընտրություններ:
Եթե մենք հասնում ենք դրան` լավ, ուրեմն կմտնենք այդ ընտրապայքարի մեջ: Բայց եթե տեսնենք, որ իշխանությունները ձգձգում են, ժամանակ են շահում, տարբեր հնարքների են գնում միայն մի նպատակով, որպեսզի ժողովրդի զգոնությունը բթացնեն և կամաց-կամաց այս պայքարը տանեն դեպի հերթական ընտրություններ` այդ ժամանակ կհավաքենք ժողովրդին, կասենք` այդ մարդիկ խաբում են, մեր համբերությունը հատված է, եկեք նորից սթափեցնենք նրանց: Սա է ճանապարհը: Երկու դեպքում էլ` թե՛ նորմալ երկխոսության, թե՛ ժամանակ ձգձգելու` պետք է ժողովրդի ակտիվությունը, որովհետև ժողովրդով ենք որևէ բանի հասնելու, մեր միակ զենքը ժողովուրդն է»,- նշեց Լ.Զուրաբյանը: