Միացյալ Նահանգները պատրաստ է աջակցել ղարաբաղյան հակամարտության խաղաղ կարգավորմանը, սակայն առաջին քայլը պետք է անեն իրենք կողմերը՝ «Ամերիկայի Ձայն»-ին հայտնել է ԱՄՆ-ի Պետքարտուղարության պատժամիջոցների քաղաքականության համակարգող Դենիել Ֆրիդը.
«Նրանք պետք է որոշեն, թե ինչ են ուզում։ Եթե նրանք խաղաղություն են ուզում, Միացյալ Նահանգները պատրաստ կլինի օգնել»:
Ֆրիդի կարծիքով՝ ԼՂհակամարտությունում ներգրավված երկրների կառավարությունները կարծես բավարար հետաքրքրված չեն խնդրի վերջնական կարգավորմամբ.
«Խնդիրն այն է, որ իշխանությունները չափազանց հարմարավետ են սկսում իրենց զգալ ղարաբաղյան խնդրի առկայության պայմաններում և մտածում են կարճաժամկետ, այլ ոչ՝ երկարաժամկետ կտրվածքով»:
Կողմերի համապատասխան պատրաստակամության դեպքում Միացյալ Նահանգները պատրաստ է Ֆրանսիայի և Ռուսաստանի հետ համատեղ անհրաժեշտ աջակցություն տրամադրել կողմերին՝ խնդրի տևական կարգավորման համար, նշում է Դենիել Ֆրիդը:
Հիշեցնենք որ Հայաստանում ընդդիմությունն անհանգստություն է հայտնում Հայաստանի իշխանությունների կողմից հնարավոր զիջումների կապակցությամբ: «Ամերիկայի Ձայն»-ի հետ զրույցում ՀՀ նախկին արտգործնախարար, նորաստեղծ «Համախմբում» կուսակցության նախագահ Վարդան Օսկանյանն առաջարկում է ժամանակավորապես սառեցնել ղարաբաղյան բանակցությունները.
«Ամենաճիշտ մոտեցումը կլինի այն, որ ԼՂ շուրջ բանակցություններն առկախվեն որոշ ժամանակով՝ մինչ հաջորդ խորհրդարանական ընտրությունները»:
Օսկանյանի կարծիքով՝ երկրի ներկա իշխանությունները ղարաբաղյան բանակցությունները տանում են սխալ ուղղությամբ.
«Ինձ համար միանշանակ է, որ բանակցությունները մեզ համար ցանկալի ուղղությամբ չեն ընթանում: Մենք արդեն ընդհանրապես կորցրել ենք ԼՂ ժողովրդի ինքնորոշման իրավունքի առաջնայնությունը, և այսօր բոլորի կենտրոնացումը ու ուշադրությունը տարածքների վերադարձի վրա է»:
Վարդան Օսկանյանի կարծիքով՝ ստեղծված պայմաններում Հայաստանի իշխանությունը պետք է հրաժարական տա՝ ազատելով հարթակը նոր ուժերի համար.
«Եթե կան մարդիկ, որ պարտվողական դիրքերից են հանդես գալիս, խնդրեմ, թող զիջեն իրենց դիրքերը: Կան ավելի կարող մարդիկ, որոնք կարող են իրավիճակ փոխել»:
Օսկանյանի կարծիքով՝ Լեռնային Ղարաբաղի խնդիրն ի վիճակի է կարգավորել ազատ և արդար ընտրությունների միջոցով ընտրված իշխանությունը.
«Դա կլինի ժողովրդի կողմից ճանաչված օրինական կառավարություն, որը և հնարավորություն կունենա նոր դիրքերից բանակցել թե՛ Թուրքիայի և թե՛ Ադրբեջանի հետ՝ փորձելով կարգավորել այդ բոլոր խնդիրները»:
Ղարաբաղյան կարգավորման մեջ կողմերի առաջնորդների դերի մասին է խոսել նաև Պետքարտուղարության ներկայացուցիչը: Դենիել Ֆրիդի խոսքով՝ առաջին քայլը պետք է անեն հենց հակամարտող կողմերի իշխանությունները.
«Այդ կառավարությունները պետք է որոշեն, թե արդյո՞ք ցանկանում են շարունակ մնալ այս իրավիճակում և դիմակայել մերթընդմերթ բախումների, թե՞ նրանք իրական կարգավորում են նախընտրում»:
