Չինաստանի իշխանությունները ստիպված են եղել հերքել այն տեղեկությունները, ըստ որոնց՝ կայսերական նախկին պալատն օգտագործվում է որպես հարուստների մասնավոր ակումբ: Այս մասին փոխանցում է BBC-ն: Եթե հավատանք այս լուրերին, ապա պալատում գործել է մի համակարգ, ըստ որի` 150 հազար դոլարով կարելի էր վարձել այն և հանգստանալ կայսերական շուքով:
Չինական ԶԼՄ-ները տարածել են սկանդալային տեղեկությունը, որի համաձայն` հարուստ մարդիկ հնարավորություն են ստանում մուտք գործել պեկինյան վերանորոգված Արգելված քաղաք և այնտեղ խնջույք կազմակերպել հարազատների և ընկերների հետ: Դրա համար նրանք պետք է դառնան ակումբի անդամ, որի մուտքի համար էլ հենց վճարվում է այդ 150 հազար դոլարը: Այս լուրը մեծ արձագանք է գտել կոմունիստական Չինաստանում:
Խոսքը Չինաստանի նախկին կայսերական համալիրի մասին է, որը 1920թ.-ին ոչնչացել է հրդեհի հետևանքով: Այն վեց տարի առաջ վերանորոգվել է Հոնգ-Կոնգի գործարարներից մեկի միջոցներով: Չինական իշխանությունները պնդում են, որ պալատն օգտագործվում է միմիայն էքսկուրսիաների, սեմինարների և մամլո ասուլիսների անցկացման համար:
Նախորդ շաբաթ Արգելված քաղաքի շուրջ ևս մեկ աղմկոտ իրադարձություն է տեղի ունեցել. թանգարանից գողացվել էր 7 թանկարժեք ցուցանմուշ: Շուտով ձերբակալվեց կասկածյալներից մեկը, գողոնի մի մասը հաջողվեց վերադարձնել:
