Ադրբեջանական APA լրատվական գործակալության փոխանցմամբ, Ադրբեջանի Միլլի մեջլիսը (խորհրդարան) բողոքի նամակ է հղելու Եվրախորհրդարան: Այսօր այդ նամակի բովանդակությունն ընթերցվել է ադրբեջանական խորհրդարանում:
Դրանում նշված է, որ Եվրախորհրդարանի ընդունած վերջին բանաձևն «անսպասելի» է եղել Ադրբեջանի համար և ունեցել է «կանխակալ» բնույթ.
«Տարածաշրջանում ու աշխարհում կան երկրներ, որոնցում կոպտորեն ոտնահարվում են մարդու իրավունքները: Բոլորին հայտնի է, որ անգամ Եվրոպայի առաջադեմ երկրներում կանխվում են չարտոնված, ապօրինի ակցիաները: Եվրախորհրդարանի բանաձևը վնասում է «ժողովրդավարական երկիր հանդիսացող» Ադրբեջանի շահերը: Միլլի մեջլիսը «կանխակալ» է համարում Եվրախորհրդարանի բանաձևը»:
Ապա խորհրդարանում տեղի է ունեցել քվեարկություն և նամակի ուղարկման օգտին քվեարկել է 100 մարդ: Դեմ արտահայտվողներ կամ ձեռնպահ մնացողներ չեն գրանցվել:
Հիշեցնենք, որ մայիսի 13-ին Եվրախորհրդարանի ընդունած բանաձևում ասվում էր, որ Ադրբեջանը շարունակում է ահաբեկել լրագրողներին և քաղաքական ակտիվիստներին և պետք է զերծ մնա ապօրինի մեղադրանքներից և երաշխավորի լրագրողների անվտանգությունը:
Եվրախորհրդարանն Ադրբեջանին կոչ էր արել ազատ արձակել Ջաբար Սավալանին և Բախտիար Հաջիևին, ինչպես նաև «Ռեալ Ադրբեջան» թերթի խմբագիր Էյնուլա Ֆատուլաևային.
«Այն բանից հետո, երբ երիտասարդ ակտիվիստներ Ջաբար Սավալանը և Բախտիար Հաջիևը Facebook-ով Ադրբեջանում հակաիշխանական ակցիաներ անցկացնելու կոչեր հնչեցրին, նրանց մեղադրանք առաջադրվեց թմրանյութեր պահելու և զինծառայությունից խուսափելու համար»:
