Այսօր Երևանում մեկնարկեց հայ-ռուսական համագործակցության միջխորհրդարանական հանձնաժողովի հերթական նիստը:
ՌԴ Պետդումայի պատգամավոր Կոնստանտին Զատուլինը, ով Երևանում է գտնվում ՌԴ ՊԴ պատվիրակության կազմում, անդրադառնալով ԵԱՀԿ Մինսկի խմբի գործունեությանն ու ղարաբաղյան հակամարտության կարգավորման գործընթացում առկա իրողություններին, այսօր հայտարարել է. «Ես միշտ դրական եմ գնահատում կարգավորման գործընթացը և բացասական այն կանգառներն ու խախտումները, որ դրանում գրանցվում են»:
Զատուլինի խոսքով, վերջերս ադրբեջանական կողմի նախաձեռնությամբ պարբերաբար հրադադարի ռեժիմի խախտումը, որ առաջին հերթին ազդում է ստատուս քվոյի վրա, լուրջ սպառնալիք է տարածաշրջանային խաղաղության համար, և բոլոր միջնորդների ջանքերն առաջին հերթին պետք է ուղղված լինեն խաղաղ գործընթացի կարգավորմանն ու հենց բանակցային գործընթացի ֆորմատի պահպանմանը:
«Թեպետ խաղաղության պահպանման առումով ներգրավված են թե՛ ԵԱՀԿ ՄԽ համանախագահները, թե՛ նաև ՌԴ նախագահ Դմիտրի Մեդվեդևը, որը պարբերաբար կազմակերպում է հանդիպումներ Սերժ Սարգսյանի ու Ադրբեջանի նախագահի մասնակցությամբ, այդուհանդերձ իրավիճակը տագնապալի է ու անհանգստացնող»,- ընդգծեց Կ.Զատուլինը:
Այն, որ թե՛ միջնորդները, թե՛ Պետդումայի պատգամավորները, թե՛ միջազգային հանրությունը շահագրգռված են խաղաղության պահպանմամբ` փաստ է ու շատ ողջունելի, նույնիսկ այն պարագայում, որ կողմերից մեկը անընդհատ հայտարարում է, թե պատրաստ է հարցը կարգավորել պատերազմի միջոցով, նշել է ռուս պատգամավորը` հավելելով. «Բայց ես հերթական անգամ հիշեցնեմ, որ Հայաստանին ու Ռուսաստանին կապում են գործընկերային լուրջ հարաբերությունները, որոնք հիմնված են նաև ՀԱՊԿ պայմանագրի, ինչպես նաև Հայաստանում ռուսական ռազմաբազայի տեղակայման ժամկետների հետաձգման վրա, որի մասին այսօր առավոտյան զրուցել ենք նաև նախագահ Սարգսյանի հետ»: Զատուլինը նաեւ ասել է, որ պայմանագրի այդ կետը , որն այս պահին սպասում է երկու պետությունների խորհրդարանների վավերացմանը, հենց տարածաշրջանային խաղաղության իմաստով է անհրաժեշտ արագացնել:
Անդրադառնալով Աստանայում կայանալիք ԵԱՀԿ գագաթնաժողովից սպասումներին՝ Զատուլինը նշել է, որ ինքը փորձում է լավատես լինել՝ համոզված լինելով, որ բանակցությունների այլընտրանքը պատերազմն է, որի վերսկսմամբ որևէ մեկը շահագրգռված չէ։