Business Грузия-ի փոխանցմամբ՝ Թուրքմենստանը մեծ հետաքրքրություն է ցուցաբերել «Ադրբեջան-Վրաստան-Ռումինիա» (AGRI) նախագծի հանդեպ, որով նախատեսվում է կասպյան գազը հեղուկ վիճակում Վրաստանի սևծովյան հատվածից ուղղել Ռումինիա:
Այս մասին Ռումինիայի նախագահ Տրայան Բեսեսկուի հետ հանդիպման ժամանակ հայտարարել է պաշտոնական այցով Բուխարեստում գտնվող Թուրքմենստանի նախագահ Գուրբանգուլի Բերդիմուհամեդովը:
Կողմերը կարևորել են եվրոպական ուղղությամբ թուրքմենական գազի առաքումները, ինչը կարող է իրականացվել Ռումինիայի համար առաջնահերթ համարվող Nabucco ու AGRI նախագծերի միջոցով:
Հիշեցնենք, որ AGRI նախագծին առնչվող Բաքվի դեկլարացիան ստորագրվել է 2010 թվականի սեպտեմբերին: Այս նախագծով շահագրգռված են Ադրբեջանը, Վրաստանը, Ռումինիան և Հունգարիան: Թուրքմենստանն էլ այս նախագծում կարող է հանդես գալ մատակարար երկրի դերում:
Թուրքմենական գազը Կասպից ծովով կհասցվի Ադրբեջան, այնտեղից խողովակաշարով կուղղվի Վրաստանի սևծովյան հատված (Կուլևիի տերմինալ), ուր կհեղուկացվի և կուղղվի ռումինական Կոնստանցա նավահանգիստ:
Փաստորեն, AGRI նախագծի իրականացման դեպքում էներգակիրների տարանցիկ երկիր հանդիսացող Թուրքիան հայտնվում է խաղից դուրս վիճակում:
