Վրացական Apsny.ge կայքի փոխանցմամբ, Վրաստանի առաջին տիկին Սանդրա Ռուլովսը մեկնել է Ֆրանսիա` մասնակցելու Եվրոպական խորհրդարանական ֆորումի կողմից կազմակերպված Գլոբալ խորհրդարանական գագաթնաժողովին և ելույթ է ունենալու Ֆրանսիայի Սենատում:
«Աղջիկներն ու բռնությունը» խորագրով գագաթնաժողովը, որին մասնակցում են ավելի քան 60 երկրների խորհրդարանականներ ու կառավարության ներկայացուցիչներ, կայանում է այսօր Փարիզում: Դրանից 10 օր անց կայանալու է «Մեծ ութնյակի» հանդիպումը:
Գագաթնաժողովի նպատակը «Մեծ ութնյակի» ուշադրության բևեռումն է ամենախնդրահարույց հարցերից մեկի վրա, ինչպիսին է երիտասարդ աղջիկների ու կանանց հանդեպ գործադրվող բռնությունների աճն ու կանանց դերը հասարակության զարգացման մեջ:
Գագաթնաժողովում մեծ ուշադրություն է հատկացվելու զարգացող երկրներում բնակվող 600 միլիոն երիտասարդ աղջիկների ու կանանց վիճակին: Շեշտը դրվելու է այդ երկրներում սոցիալ-տնտեսական բարեփոխումների իրագործման վրա, ինչը կնպաստի նրանց վիճակի բարելավմանը:
Հիշեցնենք, որ ապրիլի վերջին էլ Ռուլովսը մեկնել էր Անկարա` մասնակցելու «Կրթությունը հաղթահարում է բոլոր խոչընդոտները» ընկերության ամփոփիչ հանդիպմանը:
Հոլանդուհի իրավաբան Ռուլովսը Վրաստանի ներկայիս նախագահ Միխեիլ Սաակաշվիլիի հետ ծանոթացել է 1993 թվականին Ստրասբուրգում, իսկ վրացական քաղաքացիություն է ստացել 2008 թվականի հունվարին: