Այսօր Ռուսաստանի արտաքին գործերի նախարար Սերգեյ Լավրովը հայտարարել է, որ Տրիպոլին պատրաստ է ընդունել Աֆրիկյան Միության կողմից ներկայացված «ճանապարհային քարտեզը» և կատարել ՄԱԿ-ի Անվտանգության խորհրդի 1970 և 1973 բանաձևերի պահանջները: Այս հայտարարությունը նա արել է Մոսկվայում Քադաֆիի ներկայացուցիչների հետ հանդիպելուց հետո:
«Պատասխանը, որ մենք լսել ենք, չի կարելի բացասական անվանել: Մեզ ասվել է, որ Տրիպոլին պատրաստ է դիտարկել այն մոտեցումները, որոնք հիմնված են Աֆրիկյան Միության «ճանապարհային քարտեզի» վրա, ինչպես նաև պատրաստ են ամբողջությամբ կատարել 1970 և 1973 բանաձևերի պահանջները»,- Լավրովի խոսքերն է փոխանցում ITAR-TASS գործակալությունը:
ՌԴ արտգործնախարարը նշել է, որ այդ ամենը հնարավոր է միայն ռազմական գործողությունների դադարեցման դեպքում թե՛ ապստամների և թե՛ ՆԱՏՕ-ի կողմից: «Միայն մի բան է, որ պնդում են Տրիպոլիի մեր զրուցակիցները՝ ապստամբների կողմից նմանատիպ քայլերի և ՆԱՏՕ-ի կողմից ռմբակոծությունների դադարեցման անհրաժեշտությունն է»,- ավելացրել է Լավրովը:
Հիշեցնենք, որ երեկ Լավրովը հայտարարել էր, թե Մոսկվա են ժամանելու նաև ապստամբների ներկայացուցիչները: Նախատեսվում է, որ այդ այցը տեղի է ունենալու վաղը: