Մայիսի 17-ին սկսվեց Հունգարիայի Հանրապետության խորհրդարանի նախագահ Լասլո Կյովերի պաշտոնական այցը Հայաստան:
Հանդիպումները խորհրդարանում սկսվեցին Հայաստանի Ազգային ժողովի նախագահ Հովիկ Աբրահամյանի և Հունգարիայի խորհրդարանի նախագահ Լասլո Կյովերի առանձնազրույցով:
Ողջունելով Հունգարիայի Հանրապետության խորհրդարանի նախագահին` ԱԺ նախագահ Հովիկ Աբրահամյանը շնորհակալություն հայտնեց իր հրավերը ընդունելու և պաշտոնական այցով Հայաստան այցելելու համար և նշեց, որ նրա այցը հայ-հունգարական միջխորհրդարանական կապերի զարգացման նոր հեռանկարներ է բացում: ԱԺ նախագահի համոզմամբ պարոն Կյովերի այցը կնպաստի նաև երկկողմ հարաբերությունների ամրապնդմանը և զարգացմանը: Հովիկ Աբրահամյանը կարևորեց Հունգարիայի հետ փոխգործակցության ակտիվացումը քաղաքական, տնտեսական, մշակութային և այլ ուղղություններով: «Հայաստանը կարևորում է Եվրոպայի հետ ինտեգրումը և այն մեր արտաքին քաղաքական առաջնահերթություններից է»,- նշեց ԱԺ նախագահը:
Շնորհակալություն հայտնելով հրավերի և ջերմ ընդունելության համար` Լասլո Կյովերը նշեց, որ առաջին անգամ է պաշտոնական այցով Հայաստան այցելում Հունգարիայի խորհրդարանի նախագահ և համոզմունք հայտնեց, որ իր այցը կնպաստի ոչ միայն խորհրդարանների միջև համագործակցության խորացմանը, այլև միջպետական կապերի զարգացմանը: Նա նույնպես անհրաժեշտ համարեց երկկողմ հարաբերությունների զարգացումը տարբեր ոլորտներում` ընդգծելով, որ համագործակցության չօգտագործված մեծ ներուժ կա:
Հանդիպման ընթացքում կողմերը քննարկեցին երկկողմ հետաքրքրություն ներկայացնող հարցեր, կարևորեցին միջազգային կառույցներում համագործակցության խորացումը, խորհրդարանական դիվանագիտության դերը երկկողմ հարաբերությունների զարգացման գործում, անդրադարձ եղավ նաև տարածաշրջանային խնդիրներին: Այս համատեքստում ԱԺ նախագահ Հովիկ Աբրահամյանը շեշտեց, որ հակամարտությունները պետք լուծվեն խաղաղ բանակցությունների արդյունքում և պատերազմը 21-րդ դարում խնդիրների լուծման հնարավորություն չէ:
Համաձայնելով Հովիկ Աբրահամյանի հետ Լասլո Կյովերը հույս հայտնեց, որ տարածաշրջանային բոլոր խնդիրների լուծումները կտրվեն խաղաղ, բանակցային ճանապարհով` բացառելով ռազմական միջամտությունը: Կողմերը համակարծիք էին, որ ԼՂ հակամարտության կարգավորման միակ ձևաչափ պետք է լինի ԵԱՀԿ Մինսկի խումբը: