ԱՄՆ-ի պաշտպանության նախարարությունը ներկայացրել է զեկույց, որի համաձայն՝ առաջիկա 10 տարիներին ԱՄՆ-ին ամենամեծ սպառնալիքները կներկայացնեն Չինաստանը, Իրանը և Հյուսիսային Կորեան, որոնք զարգացնում են միջուկային հրթիռների արտադրության տեխնոլոգիան:
Պենտագոնի զեկույցում նշվում է, որ հենց Պեկինը, Թեհրանն ու Փխենյանը ի վիճակի կլինեն հարվածել ԱՄՆ-ին՝ հաղորդում է The Daily Mail-ը:
Պենտագոնը ԱՄՆ-ի գլխավոր մրցակից է համարում Չինաստանին: ՊՆ հաշվարկներով՝ չինական միջուկային հրթիռների թիվը, որոնք կարող են հասնել ԱՄՆ-ի տարածքին, առաջիկա 15 տարիներին կընդլայնվեն ավելի քան 100 միավորով: Զեկույցում ընդգծվում է, որ Պեկինը հայտարարել է 2013թ. 11.2%-ով ռազմական ծախսերը մեծացնելու մասին: Չնայած 2012թ. Չինաստանի պաշտպանության վրա պաշտոնական ծախսերը կազմել են 106 միլիարդ դոլար, Պենտագոնի տվյալներով՝ ծախսվել է 135-215 միլիարդ դոլար:
Հաղորդվում է նաև, որ Հյուսիսային Կորեան արդեն տեղակայել է նոր բջջային միջմայրցամաքային Hwasong-13 բալիստիկ հրթիռներ: Դրա հետ մեկտեղ ԱՄՆ-ի ՊՆ-ը համոզված է, որ Հյուսիսային Կորեան բալիստիկ հրթիռների զարգացման ծրագիրը փոխառել է Իրանից և Պակիստանից:
Պենտագոնի հաշվարկներով՝ արդեն 2015թ. Իրանը կարող է անցկացնել հեռահար միջմայրցամաքային բալիստիկ հրթիռի փորձարկում:
Զեկույցի համաձայն՝ ԱՄՆ-ը պաշտպանության վրա ծախսում է 500 միլիարդ դոլար:
