Ծագումնաբանության և արդիականության ինստիտուտի տնօրեն, Ի. Ճավճավաձեի անվան պետական համալսարանի ներկայացուցիչ Գիգա Զեդանիան «Կովկաս 2010» միջազգային գիտաժողովի ընթացքում ներկայացրեց իրավիճակը Վրաստանում 2010 թ. ընթացքում:
Նա նկատեց, որ 2010 թ. Վրաստանի ընտրությունները ցույց տվեցին, որ ռուսամետ ուժերը չեն գրավում վրաց քաղաքացիներին, ինչպես նաև այս ընտրությունները միջազգային դիտորդական կազմակերպությունների կողմից գնահատվեցին ժողովրդավարական՝ չնայած օրենսդրական, ընթացակարգային հարցերում որոշ թերություններին. «Այս ընտրությունները շատ լուրջ և դրական ազդեցություն ունեցան Վրաստանի արտաքին դերի բարձրացման վրա, քանզի 2008 թ. ընտրությունները, որոնց բացասական գնահատական տրվեց, Վրաստանի ապագա զարգացման նկատմամբ որոշակի կասկած էին առաջացրել: 2010 թ. ընտրությունները կանգնեցրին հեղափոխական գործընթացները Վրաստանում»:
Զեդանիան 2010-ի իրադարձություններից առանձնացրեց նաև Վրաստանի Սահմանադրության փոփոխությունը, որը բուռն քննարկում ունեցավ և իրարամերժ կարծիքների առիթ հանդիսացավ, քանզի կարծիք կար, թե այս կերպ Սաակաշվիլին երկարաձգում է իր պաշտոնավարումը և հող նախապատրաստում ապագայում մեծ լիազորություններ ունեցող վարչապետ դառնալու համար:
Սոցիալ-տնտեսական բնագավառին անդրադառնալով՝ վրաց փորձագետը նկատեց, որ Վրաստանի տնտեսությունը դրական առաջընթաց է գրանցել, իսկ հասարակական տրամադրությունների մեջ հետաքրքիր փոփոխություն է կատարվել. «Էթնիկ ազգայնականությանը եկավ փոխարինելու կրոնական ազգայնականությունը, ինչն էլ արտացոլվեց Ստալինի արձանի ապամոնտաժմամբ»: