«Ոսկե ծիրանի» շրջանակներում Հայաստանում է դերասանուհի Արսինե Խանջյանը: Նա այսօր ներկա էր Ժամանակակից արվեստի թանգարանում «Արևելքից Արևմուտք, մոդեռնից՝ պոստմոդեռն, հայ արվեստագետներ» խորագրով ցուցահանդեսին, որի բացմանը դերասանուհուն անակնկալ էր սպասվում:
Հայ արվեստը Սփյուռքում բարձր պահելու, մարմնավորած հրաշալի դերերի համար դերասանուհին ստացավ հանրաճանաչ արվեստագետ և մեծ հայրենասեր Հենրիկ Իգիթյանի անվան մրցանակ: Արսինե Խանջյանին սպասվում էր մեկ այլ անակնկալ ևս. «Բարձր արվեստի» կենտրոնի հիմնադիր Արմինե Քոչարյանը և Սարգիս Գրիգորյանը (գործի սեփականատեր) դերասանուհուն նվիրեցին Մինաս Ավետիսյանի գրաֆիկական ստեղծագործություններից մեկը:
Արսինե Խանջյանի աչքերը երջանկությունից լցվեցին, նա արցունքախառն շնորհակալություն հայտնեց ներկաներին. «Սա ինձ համար իսկապես անակնկալ էր: Այս վերջին երկու-երեք օրերին շատ հուզիչ պահեր ունեցանք, և սա ևս մեկ առիթ է և՛ Ատոմի, և՛ ինձ համար, որ կրկին գանք Հայաստան: Շատ իմաստալից էր, որովհետև շատ սիրելի ժողովրդիցս ստացա նվեր»:
Արսինե Խանջյանն ասաց նաև, որ Երևանի փողոցներում քայլելիս շատ սարսափելի իրողությունների է ականատես եղել՝ հարգում են մորը, սակայն չեն հարգում կնոջը: Նա բոլոր կանանց հորդորեց երբևէ չկորցնել սեփական «ես»-ը և պաշտպանել սեփական իրավունքները:
Մանրամասները դիտեք տեսանյութում:
