Վրացական Apsny.ge կայքի փոխանցմամբ, Վրաստանի նախագահ Միխեիլ Սաակաշվիլին կատարյալ աղետ է անվանել Թբիլիսիի բարձրահարկ շենքերում երեք օր շարունակ խմելու ջրի բացակայությունը.
«Բարձրահարկ շենքերում խմելու ջրի բացակայությունը կատարյալ աղետ է: Ինչպե՞ս պետք է 16-րդ հարկի բնակիչն իջնի ներքև և ջրամատակարար մեքենայից խմելու ջուր հասցնի իր բնակարան:
Ֆորս մաժորային իրավիճակների առաջացման դեպքում Թբիլիսիում պետք է գործի պահեստային համակարգ: Դրանով քաղաքը մշտապես պատրաստ կլինի նմանատիպ իրավիճակներին: Ընդ որում, եղած ջրային պաշարները պետք է բաշխվեն հավասարաչափ, և արտոնյալ շրջաններ չպետք է լինեն»:
Թբիլիսիի քաղաքապետն իր հերթին նշել է, որ այսպիսի իրավիճակ քաղաքում չի գրանցվել արդեն 10-15 տարի, երբ բնակչության մինչև 40 տոկոսը երեք օր կա՛մ խմելու ջուր ստանում են ընդհատումներով, կա՛մ էլ ընդհանրապես չեն ստանում:
Որպես ջրամատակարարման խափանման պատճառ է նշվում Արևելյան Վրաստանով անցնող, Կուրի ձախ վտակ Արագվի գետի վարարումը և մաքրման համակարգերի գլխավոր կառույցների շարքից դուրս գալու վտանգը:
Հիշեցնենք, որ վերջին շրջանում վրացական իշխանությունների ուշադրության կենտրոնում է հայտնվել ջրային ապահովման խնդիրը: Ջրով ապահովված է երկրի բնակչության 65 տոկոսը:
Եթե երկրի խոշոր քաղաքների բնակիչներն ապահովված են ջրով, ապա գյուղերի մեծ մասի համար դա շարունակում է խնդիր մնալ։ Սա հատկապես վերաբերվում է հեռավոր շրջանների գյուղերին:
Ջրային ապահովման հարցում առանձնահատուկ ուշադրություն է հատկացվում Արևելյան Վրաստանին, որը համարվում է երկրի հիմնական գյուղատնտեսական շրջանը: