Վրացական GHN լրատվական գործակալության փոխանցմամբ, ռուս և օտար փորձագետները նոր արյունալի բախումներ են կանխատեսում ռուսալեզու մաֆիայի տարբեր խմբավորումների միջև: Վերջին շրջանում հնչեղ սպանություններ ու մահափորձեր են գրանցվել հանցավոր հեղինակությունների դեմ: Այդպիսի դեպքեր անգամ գրանցվել են Մոսկվայի կենտրոնում:
Որոշ տվյալներով` Դեդ Հասանի ազդեցիկ խմբավորմանը ձեռնոց է նետել այսպես կոչված աբխազական գողական ընտանիքը, ինչն անխուսափելիորեն հանգեցնելու է մեծ արյունահեղության:
Օպերատիվ տվյալներով` «հանցագործ աշխարհի թագավոր» Ասլան Ուսոյանը, ով հայտնի է «Դեդ Հասան» մականվամբ «թագադրել» է հինգ նոր օրենքով գողերի, ինչը Ռուսաստանում կարող է առաջացնել նոր կրիմինալ պատերազմ:
Նշվում է, որ Դեդ Հասանն այդ քայլին է գնացել այն բանից հետո, երբ սուխումյան գողական ընտանիքը, որում ներառված են հայտնի հեղինակություններ Մերաբ Սուխումցին ու Տարիել Օնիանին, սպառնալիքներ է հղել նրա հասցեին:
Վրաց (սուխումցի ու թբիլիսցի) գողականները վաղուց հակամարտության մեջ են մտել Դեդ Հասանի խմբավորման հետ: Նրանք կարծում են, որ Դեդ Հասանը խախտում է գողական օրենքները` օրենքով գողի գործունեությունը խառնելով կոմերցիայի հետ:
Օրինակ, ավանդական գողականները պետք է պահպանեն հետևյալ կանոնները. ապրել միայն հանցագործությունների հաշվին, ինչպես նաև անձամբ մասնակցություն ունենալ գողություններին ու թալանին:
Այն բանից հետո, երբ հայտնի դարձավ, որ Դեդ Հասանը պլանավորում է «թագադրել» հինգ նոր օրենքով գողերի, նրա հակառակորդները սպառնացին սպանել նրան ու այդ հինգ նոր գողերին: Ի պատասխան այդ սպառնալիքների` Հասանը «թագադրեց» նրանց:
Այժմ Ռուսաստանում սպասվում է նոր կրիմինալ պատերազմ, ինչը մտահոգում է նաև ռուսական ուժային կառույցներին:
