Իսրայելում բնակվող Լիոր և Վարդիթ Ադլեր ամուսիններն իրենց դստեր անունը դրել են Like (Հավանել)` «ի պատիվ» Facebook սոցիալական ցանցի համանուն կոճակի, որի միջոցով հնարավոր է հավանել այս կամ այն հրապարակումն ու գրառումը: Այս մասին հաղորդում է իսրայելական Maariv-ը:
«Մեր կարծիքով, «լայքը» «սեր»-ի համարժեքն է մեր օրերում»,- ասել է Լիոր Ադլերը: Մինչ երեխային այս անունով կոչելը, ծնողները հարց ու փորձ են արել` պարզելու, թե արդյոք ինչ-որ մեկն Իսրայելում իրենցից առաջ չի՞ ընկել, քանի որ Ադլեր ամուսինները ցանկացել են օրիգինալ լինել իրենց դստեր անվան ընտրության մեջ: Բացի այդ, ծնողներն ավելացրել են, որ այս անունը տվել են իրենց դստերը, քանի որ ցանկացել են, որ այն լինի «ժամանակակից և նորարարական»:
Մենք արդեն տեղեկացրել էինք, որ Եգիպտոսում հեղափոխությունից հետո երիտասարդ մի ընտանիք իրենց նորածին դստեր անունը Facebook էր դրել, քանի որ սոցիալական այդ ցանցը մեծ դերակատարություն էր ունեցել եգիպտական հեղափոխության մեջ: