ԵԽ Մարդու իրավունքների հանձնակատար Թոմաս Համարբերգը մայիսի 9-ին հրապարակած զեկույցի 67-րդ կետում նշել է. «Պարոն Նիկոյանը նաև իր դժգոհությունն արտահայտեց հանձնաժողովի կատարած հարցումների կապակցությամբ ոստիկանության` համագործակցելու չհակված վերաբերմունքի առումով, ինչն ամբողջությամբ չէր արտացոլվել հանձնաժողովի գրավոր զեկույցում: Նա հիշեցրեց, որ ոստիկանությունը լրագրողներից և քաղաքացիներից առգրավել և ջնջել էր որոշ տեսանյութեր, որոնք կարող էին վճռորոշ լինել դեպքերի հանգամանքների պարզաբանման առումով»:
«Առաջին լրատվականի»-ի հետ զրույցում Փաստահավաք խմբի նախկին ներկայացուցիչ Անդրանիկ Քոչարյանը, անդրադառնալով Համարբերգի վերոնշալ գնահատականին, նկատեց. «Պարոն Նիկոյանի և նրա ղեկավարած հանձնաժողովի աշխատանքին մեր հանրությունը ծանոթ է: Արդեն ի հայտ են գալիս փաստեր, որ այդ հանձնաժողովի խնդիրը եղել է փաստերը կոծկելը: Չմոռանանք, որ պարոն Նիկոյանը կոծկել էր նաև դիպուկահարի մասնակացության մասին տեղեկատվությունը: Հիմա էլ պարզվում է` Նիկոյանը այլ տեղեկատվություն է ունեցել, որը հանրությանը չի ներկայացրել, և իր զեկույցում այդ մասին բան ներառված չէ: Սա փաստում է այն մասին, որ այդ հանձնաժողովն ունեցել է մեկ խնդիր` հնարավորինս պարտակել ձեռքի տակ հայտնված տեղեկատվությունը, որը կարող էր ինչ-ինչ հարցերի պատասխան տալ, այսինքն` նրա խնդիրը եղել է իշխանության տարբերակը ամրապնդելը:
Կարծում եմ` հիմա պարոն Նիկոյանն էլ հասկացավ, որ որևէ բան պարտակելը պատվաբեր գործ չէ, և դրա պատասխանատվությունը ինչպես մասնակից մյուս բոլոր պաշտոնյաները, այնպես էլ ինքը պետք է կիսի, ուստի պարոն Նիկոյանն էլ իր հերթին պետք է բացատրություն տա, թե ինչու է այս տեղեկատվությունը հանրությունից թաքցրել:
Ի վերջո, բոլոր պաշտոնյաները պետք է հասկանան` եթե պետական պաշտոնյա ես, պետք է ազնվորեն ծառայես պետությանը և գործող օրենքներին, եթե դա չես անում` դառնում ես շատ խոցելի և օրենդրության հետ ապագայում խնդիրներ ունեցող անձ»:
