«Թալիբան» աֆղանական շարժումը ժամանակավորապես փակում է իր ներկայացուցչությունը Կատարի մայրաքաղաք Դոհայում՝ հաղորդում է ITAR-TASS-ը:
Թալիբները նշել են, որ գրասենյակը ժամանակավորապես փակելու որոշման պատճառն այն է, որ ԱՄՆ-ի և Աֆղանստանի կառավարությունները չեն կատարել իրենց տված խոստումները: Բացի այդ, տեղի իշխանությունները կարգադրել են շենքի վրայից հանել շարժման խորհրդանիշները:
Դոհայում շարժման գրասենյակը փակվել է հունիսի 18-ին: Դրանում նախատեսվում էր բանակցություններ անցկացնել ԱՄՆ-ի և «Թալիբան»-ի ներկայացուցիչների միջև, սակայն բանակցությունները խափանվել են:
Շարժումը գրասենյակն անվանել է «Աֆղանստանի իսլամական էմիրությունների» ներկայացուցչություն, ինչն առաջացրել է Քաբուլի դժգոհությունը: Երկիրն այսպես է կոչվել թալիբների վարչակարգի ժամանակ՝ 1996-2001թթ.:
Աֆղանստանի նախագահ Համիդ Քարզայն իր դժգոհությունն է հայտնել այն կապակցությամբ, որ ներկայացուցչության շենքում բարձրացվել է նախկին էմիրությունների դրոշը:
