Արգենտինայի նախագահ Քրիստինա Ֆերնանդես դե Կիրշները հույս ունի, որ Հարավամերիկյան ընդհանուր շուկայի երկրները (Mercosur) Մոնտևիդեոյում կայանալիք գագաթնաժողովին Վաշինգտոնից բացատրություն կպահանջեն վերջերս հայտնի դարձած ԱՄՆ լրտեսության վերաբերյալ, որն իրականացվել է Լատինական Ամերիկայի երկրներում:
«Հույս ունեմ, որ ուրբաթ օրը Mercosur-ի հանդիպման ժամանակ մենք՝ նախագահներս, կոշտ դիրքորոշում կարտահայտենք և բացատրություն կպահանջենք»,- ասել է Կիրշները:
Նրա խոսքերով՝ ԱՄՆ լրտեսության վերաբերյալ վերջին հրապարակումները «ոչ այնքան բացահայտումներ էին, որքան հաստատում այն բանի, ինչը մենք գիտեինք»: «Մեզ բոլորիս լրտեսում են նրանց (ԱՄՆ) տրամադրած ծառայությունների միջոցով»,- հավելել է նա:
Ինչպես հայտնել է բրազիլական O Globo պարբերականը, ԱՄՆ-ի լրտեսական ցանցը տարածված է եղել ամբողջ Լատինական Ամերիկայում, իսկ լրտեսվել են ոչ միայն ռազմական, այլև կոմերցիոն գաղտնիքները:
Հավելենք, որ Mercosur-ի հանդիպումը տեղի կունենա հուլիսի 11-12-ը՝ Մոնտևիդեոյում:
