Մայիսի 12-ին Ֆրանսիայում Հայաստանի դեսպան Վիգեն Չիտեչյանը Ֆրանսիայի «Անվտանգության և արդարադատության ազգային բարձրագույն դպրոցի» ունկնդիրների ընկերության հյուրն էր: Ընկերության հրավերով կազմակերպված քննարկմանը դեսպանը հանդես եկավ Հայաստանի արտաքին անվտանգության վերաբերյալ զեկուցումով, պատասխանեց ներկաների հարցերին:
Քննարկմանը ներկա էին ընկերության նախագահ Քրիստիան Ֆրեմոն, գլխավոր քարտուղար Ժան-Ժակ Սանվերը եւ ընկերության մոտ 50 անդամներ: Ներկայացնելով եւ շնորհակալություն հայտնելով հյուրին հրավերն ընդունելու համար` Քրիստիան Ֆրեմոն հիշեցրեց 2010թ. ընկերության պատվիրակության` Հայաստան այցելության մասին, որի ժամանակ պատվիրակությունը հնարավորություն էր ունեցել հանդիպումներ ունենալ Հայաստանի կառավարության անդամների, հոգևոր առաջնորդների, քաղաքացիական հասարակության ներկայացուցիչների հետ:
Դեսպանն իր ելույթում անդրադարձավ Հայաստանի և Հարավային Կովկասի անվտանգության խնդիրներին, հարեւանների հետ Հայաստանի հարաբերություններին, Լեռնային Ղարաբաղի խնդրին, հայ-թուրքական հարաբերություններին, Եվրոպական Միության և ՆԱՏՕ-ի հետ Հայաստանի մերձեցման գործընթացին և Հայաստանում եվրոպական չափորոշիչների ներդրմանը, երկրի տնտեսական զարգացման խնդիրներին, հայ-ֆրանսիական երկկողմ հարաբերություններին ու Ֆրանկոֆոնիայի միջազգային կազմակերպության հետ համագործակցությանը: Դեսպանը պատասխանեց նաև ներկաների հարցերին: