Ադրբեջանի խորհրդարանի պատգամավոր, քաղաքագետ Ռասիմ Մուսաբեկովը չի բացառում, որ «Եվրատեսիլ-2012» երգի մրցույթն Ադրբեջանում անցկացնելու հանգամանքը կարող է մեղմել ռազմական հռետորաբանությունը:
«Կարծում եմ, որ ռազմական հռետորաբանությունը կմեղմվի, բայց պատերազմական գործողություններին իրական պատրաստությունները կշարունակվեն»,- նկատեց Մուսաբեկովը «Առաջին լրատվականի» հետ զրույցում:
Նկատենք, որ 2014թ. օլիմպիական խաղերը Ռուսաստանում անցկացնելու որոշումը մեծապես օժանդակեց այն հանգամանքին, որ ռուս-վրացական պատերազմը չշարունակվեր: Կա կարծիք, որ Եվրատեսիլում հաղթանակը Ադրբեջանին տալով՝ միջազգային հանրությունը ցանկանում է կանխել հայ-ադրբեջանական պատերազմի վերսկսումը:
Ադրբեջանցի պատգամավորը նկատեց, որ ղարաբաղյան խնդիրը մնում է անլուծելի, իսկ Ադրբեջանը չի պատրաստվում հավերժ համակերպվել «հայկական զորքերի կողմից սեփական տարածքների օկուպացիային և այդ մասին շատ խիստ հայտարարել ու հայտարարում է». «Եթե ինչ-որ մեկին կհանգստացնի ռազմական հռետորաբանության նվազումը, ապա խորհուրդ կտայի չգայթակղվել»: