Վրացական GHN լրատվական գործակալության փոխանցմամբ, այսօր «Վրացական կուսակցության» ներկայացուցիչները, որոնք բողոքի ակցիա են կազմակերպել Թբիլիսիում ԱՄՆ դեսպանատան առջև, ուղերձ են հղել ԱՄՆ նախագահ Բարաք Օբամային` կոչ անելով հրաժարվել Միխեիլ Սաակաշվիլիի ռեժիմին աջակցելուց.
«Վրաստանի բնակիչներն ու վրաց ժողովուրդը հարգում են ժողովրդավարական արժեքներն ու դրանց կենսագործումը: Սակայն Սաակաշվիլիի կառավարությունը, դժբախտաբար, հակասում է դրանց և պայքարում է դրանց դեմ: Նրա համար իրական ժողովրդավարությունը համարվում է անընդունելի:
Իշխանությունները յուրացրել են ազգային հեռուստաալիքները, գաղտնալսում են հեռախոսազրույցները, միջամտում են մարդկանց անձնական կյանքին: Բանակն ու ոստիկանությունը քաղաքականացված են և պաշտպանում են իշխանական շահերը` մասնակցելով ընդդիմության բողոքի ակցիաներին և այլն: Դատական համակարգն անկախ չէ:
Այս ամենի պատճառով մարդիկ չեն կարողանում հասկանալ, թե ինչու է ԱՄՆ-ը աջակցում Միխեիլ Սաակաշվիլիի ռեժիմին: «Վրացական կուսակցությունը» նախագահ Օբամային կոչ է անում դադարեցնել այդ աջակցությունը և, Սաակաշվիլիի փոխարեն, աջակցել Վրաստանին: Այս ուղերձը վկայում է այն մասին, որ մենք մեծ հարգանք ենք ցուցաբերում ԱՄՆ նկատմամբ և գիտակցում ենք, որ ԱՄՆ-ը Վրաստանի կարևոր գործընկերն է»:
