ԱՄՆ-ը Սիրիայում քիմիական զենքի կիրառման նոր դեպքերի ապացույցներ չունի: Ինչպես հաղորդում է ITAR-TASS-ը, այս մասին հայտարարել է ԱՄՆ Պետդեպարտամենտի պաշտոնական ներկայացուցիչ Ջեն Պսակին:
«Մենք չենք կարող հաստատել այդ հաղորդագրությունները: Իհարկե, մենք տեսել ենք դրանք: Սակայն մեզ անհրաժեշտ է հավելյալ տեղեկատվություն, և դեռևս, ցավոք սրտի, չունենք տվյալներ անկախ աղբյուրներից»,- ասել է Պսակին:
Պետդեպարտամենտի ներկայացուցիչը հիշեցրել է Վաշինգտոնի՝ վերջերս կայացրած որոշման մասին՝ «փոխել սիրիական ընդդիմությանը ցուցաբերվող օգնության չափերն ու տեսակները» կառավարական ուժերի կողմից քիմիական զենքի կիրառման մասին հաղորդագրությունների կապակցությամբ:
«Ես, ինչպես նախկինում, չեմ կարող բացահայտել մանրամասներն այն բանի, թե ինչ է դա նշանակում»,- ասել է նա:
Պսակիի խոսքով՝ ԱՄՆ-ը քննարկում է բոլոր հավելյալ տարբերակները՝ բացառությամբ ցամաքային ներխուժման:
