Վրացական GHN լրատվական գործակալության փոխանցմամբ, 2012 թվականին կայանալիք խորհրդարանական ընտրություններից հետո Վրաստանի խորհրդարանն ամբողջովին փոխադրվելու է Քութայիսի:
Այդ նպատակով համապատասխան փոփոխություններ պետք է արվեն Վրաստանի Սահմանադրությունում:
Այդպիսի նախաձեռնությամբ այսօր հանդես է եկել խորհրդարանի բյուրոն: Սակայն ուշագրավն այն է, որ դրանց համաձայն` խորհրդարանը պետք է իր գործունեությունը ծավալի թե՛ Թբիլիսիում, թե՛ Քութայիսիում:
Քութայիսիում արդեն սկսվել է խորհրդարանի նոր շենքի կառուցումը: Առայժմ անհայտ է Թբիլիսիի Ռուսթավելի պողոտայի վրա գտնվող Վրաստանի խորհրդարանի շենքի ճակատագիրը:
Հիշեցնենք, որ օրեր առաջ Վրաստանի նախագահ Միխեիլ Սաակաշվիլին, խոսելով երկրի առաջիկա պլանների մասին, նշել էր. «Եթե ուշադրություն դարձնեն մեր գործունեությանը, ապա կտեսնեն, որ մենք ընդլայնել ենք դրա աշխարհագրությունը: Եթե նախկինում ողջ ուշադրությունը հատկացվում էր Թբիլիսիին, որը, Վրաստանի կարևոր կենտրոն լինելուց բացի, նաև Կովկասի մայրաքաղաքն է, ապա այժմ կառավարության «նշանակետում» է գտնվում Քութայիսին, որը վեր է ածվելու երկրորդ քաղաքական կենտրոնի: Այն կդառնա «խորհրդարանական մայրաքաղաք», և այնտեղ կտեղակայվեն բազմաթիվ կառավարական գերատեսչություններ: Դրա հետ մեկտեղ, պլանավորված է Բաթումում ստեղծել ֆինանսատնտեսական կենտրոն»:
