Վրացական Civil.ge կայքի փոխանցմամբ, Վրաստանի նախագահ Միխեիլ Սաակաշվիլին վերստին շնորհակալություն է հայտնել Ռուսաստանին` մի քանի տարի առաջ վրացական գինիների ներկրման վրա բեռնարգելք դնելու համար, քանի որ դա նպաստել է գինու որակի բարձրացմանը և վրացական գինիների համար ճանապարհ է հարթել դեպի միջազգային շուկաներ.
«Վերջին տարիներին գինու որակը զգալիորեն բարելավվել է: Մեծապես շնորհակալ եմ Ռուսաստանին, քանի որ նրա կիրառած բեռնարգելքը մեզ օգնել է գինու որակի բարձրացման տեսանկյունից: Այժմ մենք գտնվում ենք այնպիսի վիճակում, որ եթե թույլատրվի մեր գինիների մուտքն այնտեղ (Ռուսաստան), դա լավ կլինի, սակայն եթե չթույլատրեն, ապա ոչինչ, շուկաներ կան ողջ աշխարհում:
Բացի այդ, եթե տարեկան Վրաստան այցելի 5 միլիոն զբոսաշրջիկ, ապա հազիվ թե Վրաստանը կարողանա գինի արտահանել»:
Հիշեցնենք, որ Ռուսաստանը վրացական, ինչպես նաև մոլդովական գինիների ներկրման արգելքը կիրառել է 2006 թվականին:
Ի դեպ, Սաակաշվիլին 2010 թվականի աշնանը նույնպիսի շնորհակալություն էր հայտնել անձամբ ՌԴ վարչապետ Վլադիմիր Պուտինին` ընդգծելով, որ Վրաստանն արդեն հաղթահարել է գինու ճգնաժամը և սկսել է արտադրել բարձրորակ գինիներ, որոնք միջազգային շուկաներում մրցակցում են ֆրանսիական ու իսպանական գինիների հետ: