Հայաստանը ակտիվ գործունեություն է վարում ինտեգրման երկու ուղղություններով. եվրոպական ուղղությամբ երկիրը մոտ է պարտավորեցնող փաստաթղթի՝ Արևելյան գործընկերության շրջանակներում Ասոցացման համաձայնագրի վավերացմանը և ստորագրմանը, որի բաղկացուցիչ մասը ԵՄ-ի և Հայաստանի միջև Խորը և համապարփակ ազատ առևտրի գոտու համաձայնագիրն է:
Այս մասին հայտարարել է Հայաստանի Հանրապետությունում Ռուսաստանի Դաշնության նախկին դեսպան Վյաչեսլավ Կովալենկոն EvrazesNews.ru-ին տված հարցազրույցի ժամանակ:
«Եվրասիական ուղղությամբ ուսումնասիրում է արտոնություններ ստանալու հնարավորություններն այն շրջանակներում, որոնք նրա համար հասանելի կմնան վերոնշյալ համաձայնագրի ստորագրումից հետո»,- ասել է դիվանագետը:
Նրա խոսքերով՝ Հայաստանը շարունակում է մնալ բազմավեկտոր արտաքին քաղաքականության դիրքերում՝ դաշնակցային հարաբերություններ պահպանելով Ռուսաստանի, գործընկերային հարաբերություններ՝ Եվրամիության հետ:
«Դա ապացուցեց նաև նախագահ Ս. Սարգսյանը, երբ Վարշավայում վերջերս կայացած մամլո ասուլիսի ժամանակ հայտարարեց՝ «Մենք երբեք քայլեր չենք կատարել, որոնք կարող էին ուղղվել Ռուսաստանի դեմ: Մենք բարեկամ ժողովուրդներ ենք, ունենք ընդհանուր պատմություն և հպարտ ենք այդ պատմությամբ»: Եվ ամեն դեպքում ստացվում է, որ Հայաստանի և Ռուսաստանի միջև դաշնակցային հարաբերություններն ունեն իրենց սահմանները: Նախագահի խոսքով՝ «հայ ժողովուրդը եվրոպական արժեքների կրող է և իր հասարակությունը կզարգացնի՝ հիմնվելով հենց այդ արժեքների վրա»»,- ասել է դեսպանը և հավելել, որ ոչ ոք չի ասում, թե ԱՊՀ երկրները (այդ թվում նաև՝ Հայաստանը) պետք է աշխարհին նայեն Ռուսաստանի աչքերով:
Կովալենկոյի խոսքերով՝ յուրաքանչյուր անկախ պետություն քաղաքական ընտրության լիակատար իրավունք ունի, և դա ճիշտ է, սակայն տվյալ դեպքում հարց է ծագում՝ արդյոք տեղի չի՞ ունենում եվրոպական արժեքների արժեզրկում, ինչի մասին վկայում են ոչ միայն ԵՄ երկրներում, այլ նաև Մերձավոր Արևելքում տեղի ունեցող իրադարձությունները:
Նա նշել է, որ եվրոպական երկրները Հայաստանին առաջարկում են առաջնորդվել «հանուն ավելի շատի» բանաձևով:
«Իսկ ի՞նչ իրական օգնություն է ցուցաբերել Եվրամիությունը Հայաստանին՝ բացի խորհուրդներից և խոստումներից, գոնե վերջին տարվա ընթացքում: Իր պահոցում հավաքելով եվրոպական արժեքներ՝ Հայաստանը կարող է կանգնել սայթաքուն ուղու վրա»,- ասել է նա:
Դեսպանը նշել է, որ Հայաստանի և ԵՄ-ի միջև վերոնշյալ համաձայնագրի ստորագրման դեպքում հայ-ռուսական հարաբերություններում, ամենայն հավանականությամբ, կհայտնվի սեփական ազգային շահերը հաշվի առնելու ձգտում, ինչպես դա անում է, օրինակ, Եվրամիությունը:
«Իհարկե, մնալով դաշնակիցներ՝ մենք երկկողմ հարաբերությունները կզարգացնենք հավասար և փոխշահավետ հիմքով»,- հավելել է Կովալենկոն:
Լուսանկարը՝ PanARMENIAN Photo-ի
