Ադրբեջանական Salam News գործակալության փոխանցմամբ, Ադրբեջանում բնակվող և իրենց նախկին բնակության վայր վերադառնալ ցանկացող թուրք-մեսխեթցիները (ախալցիխյան թուրքեր) տարեվերջին կստանան հայրենադարձի կարգավիճակ: Այս մասին հայտարարել է թուրք մեսխեթցիների Vatan («Հայրենիք») միության խորհրդի ղեկավար Շամսադին Սարվարովը.
«Վրաստան վերադառնալ ցանկացող թուրք-մեսխեթցիների վերաբնակեցման գործընթացն արագացնելու համար ստեղծվել է այդ երկրի պաշտոնատար անձանցից բաղկացած հանձնաժողով: Մենք հասել ենք նրան, որ մինչև տարեվերջ հայրենադարձի կարգավիճակ ստանան: Դրանից որոշ ժամանակ անց էլ կմեկնարկի նրանց վերադարձի գործընթացը»:
Նշվում է, որ 13,000 ադրբեջանաբնակ թուրք-մեսխեթցիները Վրաստան վերադառնալու հայտ են ներկայացրել: Դրանցից 5,428-ն արդեն ներկայացվել է վրացական կողմին:
Հիշեցնենք, որ 1944 թվականին Ստալինի հրամանով անհուսալի տարր համարվող թուրք-մեսխեթցիները բռնագաղթեցվեցին Վրաստանի հարավարևմտյան հատվածից և հաստատվեցին Ղազախստանում, Ղրղզստանում ու Ուզբեկստանում:
Երբ 1999 թվականի ապրիլի 27-ին Վրաստանը դարձավ ԵԽ-ի 41-րդ անդամը, հենց Թուրքիայի նախաձեռնությամբ ու ԱՄՆ-ի անմիջական աջակցությամբ պարտավորվեց ստանձնել թուրք-մեսխեթցիների վերադարձի ապահովումը:
Այժմ պլանավորված է 2011-2013 թվականներին կենսագործել «Դյոնուշ» («Վերադարձ») պլանը և Ջավախքում վերաբնակեցնել թուրք-մեսխեթցիների 6,000 ընտանիքի: Թուրքիան ակտիվորեն սատարում է այդ գործընթացին: