Մեծ Բրիտանիայում բժիշկներն այս տարվանից սկսելու են անցկացնել արյան թանկարժեք անալիզ, որը թույլ կտա պարզել, թե քանի տարի կապրի արյուն հանձնած մարդը: Այս մասին հաղորդում է The Independent-ը:
Այս տեստը, որն էթիկայի առումով արդեն լուրջ վեճեր է առաջ բերել, թույլ է տալիս չափել մարդու քրոմոսոմների մեջ առկա հատուկ մարմնիկները: Գիտնականները կարծում են, որ այդ մարմնիկների միջոցով հնարավոր է պարզել, թե ինչ արագությամբ է մարդը ծերանում:
«Մենք գիտենք, որ մարդիկ, որոնց արյան մեջ այդ մարմնիկները` քրոմոսոմների «վերջույթները», կարճ են, երկար չեն ապրում: Սակայն մենք չգիտենք, թե արդյո՞ք երկար մարմնիկները երկար կյանք են պարգևում այդ քրոմոսոմի տիրոջը»,- հայտարարել է Մադրիդի քաղցկեղի ուսումնասիրության իսպանական ազգային կենտրոնի աշխատակից Մարիա Բլասկոն:
Այս տեստն անցկացնելու համար անհրաժեշտ է վճարել 500 եվրո: Ըստ գիտնականների՝ այն շատ պահանջված կդառնա առաջիկա 5-10 տարիների ընթացքում: