ՀՀԿ խմբակցության անդամ Գագիկ Մելիքյանն, այսօր լրագրողների այն հարցադրմանը, թե արդյո՞ք ինքը չի համարում, որ Մարտի 1-ի գործով մինչ այսօր տարվող քննությունը սխալ կամ ուղղորդված ընթացք է ունեցել, քանի որ երեք տարի պահանջվեց, որ «զարթնեն» ու հանկարծ որոշեն հարցաքննության կանչել Ռոբերտ Քոչարյանին և Լևոն Տեր-Պետրոսյանին, ասաց. «Ես չեմ կարծում, որ նոր են զարթնել, ես չեմ կարծում, որ քննությունը գնացել է այլ, սխալ ճանապարհով: Ես ավելի շատ հակված եմ մտածելու, որ նոր հիմքեր, փաստեր են հայտնաբերվել, և դրանց հայտնվելը չի նշանակում, որ նախորդ ամբողջ քննության պրոցեսը սխալ է գնացել»:
Խոսելով Մարտի 1-ին նախորդած և հաջորդած իրադարձությունների մասին՝ Գագիկ Մելիքյանը նախ ասաց, որ իր կարծիքով՝ «ինչ որոշումներ կայացվել են, դրանք օրենքի սահմաններում են եղել», իսկ հետո նշեց. «Ես չեմ կարծում, որ որևէ մեկը հրահանգել է, որ տասը հոգի պետք է զոհվեն կամ մարտական փամփուշտներով գործողություններ պետք է իրականացվի և մարդկանց վրա հրազեն օգտագործվի: Ես չեմ կարծում, որ նման հրահանգներ եղել է ընդհանրապես»։
Երբ Գագիկ Մելիքյանից փորձեցինք պարզաբանում ստանալ իր հնչեցրած երկու հակասական կարծիքների վերաբերյալ, թե ինչպես է, որ ամեն ինչ ըստ օրենքի է եղել, բայց միևնույն ժամանակ կասկածում է, որ նման հրահանգ ընդհանրապես տրվել է, ինչը ենթադրում է, որ ոստիկանությունը և ուժային կառույցներն այդ օրը գործել են ինքնագլուխ, նույնն է թե՝ օրենքի խախտմամբ, Մելիքյանը պատասխան հարց ուղղեց.
«Եվ դուք հավատու՞մ եք, որ ինչ-որ մեկը հրահանգել է, որ մարդ սպանեն, նման հրահանգ հնարավո՞ր է լիներ: Այո, սպանվածներ կան, և խնդիրը նրա մեջ է, որ պետք է հիմնավորված ձևով ճշտվի, ովքեր են կատարել այդ գործողությունները և բոլոր մեղավորները պետք է ենթարկվեն պատասխանատվության»։
«Այդ թվում և նախկին նախագահ Ռոբերտ Քոչարյա՞նը» – լրագրողներից մեկի հարցին, Մելիքյանը պատասխանեց. «Ո՛վ ուզում է լինի»: