«Եվրասիա» համագործակցություն հիմնադրամի տնօրեն, հրապարակախոս Գևորգ Տեր-Գաբրիելյանը «Առաջին լրատվական»-ի հետ զրույցում ներկայացնելով հուլիսի 17-ից ի վեր Հայաստանում ստեղծված ճգնաժամային իրավիճակի պառճառները՝ նշեց. «Ես կարծում եմ՝ պահանջը ոչ թե Ժիրայր Սեֆիլյանի ազատ արձակումն է, այլ կառավարության, Սերժ Սարգսյանի, նոմենկլատուրայի հարցը, որը դրել է այդ խումբը»:
Նրա խոսքով՝ պատճառների մասին խոսելիս գիտության մեջ սովորաբար օգտագործում են կառուցվածքային բռնություն հասկացությունը. «Կա բռնության մի քանի տեսակ՝ ֆիզիկական, հոգեբանական և կառուցվածքային: Երբ քաղաքական, սոցիալական, տնտեսական համակարգը արդար չէ, և այդ անարդարության քանակը շատ է, ստեղծվում է, այսպես կոչված, կառուցվածքային բռնության իրավիճակ, ինչն էլ առաջացնում է այլ տեսակի բռնություններ»:
Նրա խոսքով՝ Հայաստանում կուտակված բազմաթիվ և բազմատեսակ խնդիրները հանգեցրին այն բանին, որ ինչ-որ մի տեղ օղակը պայթեց:
Մեր զրուցակցի կարծիքով՝ «Սասնա ծռերը» ընդգծեց այն շիզոֆրենիկ իրավիճակը, որում գտնվում է Հայաստանի (և ոչ միայն) հասարակությունը. «Հայաստանում նորմալ մարդիկ մի կողմից՝ չեն կարող արդարացնել այդ բռնի արարքը, մյուս կողմից՝ այնքան լավ են հասկանում, որ այս արարքը կառուցվածքային բռնության հետևանք էր, որ չեն կարող նաև չսատարել այս խմբին»:
«Սա վերք է Երևանի տարածքներից մեկում, որը անհայտ է, թե երբ կվերանա և ինչպես կվերանա. կարող է ավելի խորանալ»,- ասաց Գևորգ Տեր-Գաբրիելյանը՝ հավելելով, որ ինքը չի տեսնում այս իրավիճակի վերացման ոչ բռնի ճանապարհներ, ինչը նշանակում է, որ մեր պետականությունը ավելի մեծ փորձության է ենթարկվելու:
Մանրամասները՝ տեսանյութում:
