Եվրոպայում շարունակվում են «սահմանային վեճերը»: Երեկ Դանիան որոշում է կայացրել խստացնել սահմանային հսկողությունը իր հարևանների հետ: Դանիայի կառավարության այս որոշումը մեծ մտահոգությունների տեղիք է տվել եվրոպական ինտեգրացիայի կողմնակիցներին և Եվրահանձնաժողովին, չնայած այն հանգամանքին, որ դանիացիները նշել են, թե այդ քայլին գնում են մաքսանենգության, անօրինական ներգաղթի և մարդկանց առևտրի դեմ պայքարելու համար:
Եվրամիությունն անմիջապես քննադատել է մաքսային վերահսկողությունը վերականգնելու դանիացիների որոշումը: Այնտեղ նշել են, որ բոլոր տեսակի մշտական սահմանային ստուգումները խախտում են ԵՄ-ում մարդու ազատ տեղաշարժի և ազատ բեռնափոխադրումների բոլոր կանոնները:
Եվրահանձնաժողովի նախագահ Ժոզե Մանուել Բառոզուն նամակ է հղել Դանիայի վարչապետին` իր մտահոգությունն արտահայտելով այս կապակցությամբ. «Սա (սահմանները փակելու որոշումը.- 1in.am) կասկածի տակ է դնում առավելությունների այն հարցը, որը միավորված առանց սահմանների տարածքը տրամադրում է ինչպես գործարարներին, այնպես էլ շարքային քաղաքացիներին»,- իր նամակում ասել է Բառոզուն: