Ռուսական РБК կայքի փոխանցմամբ, հոլիվուդյան «Օգոստոսի հինգ օրը» ֆիլմը, որը պատմում է 2008 թվականի օգոստոսին տեղի ունեցած ռուս-վրացական պատերազմի մասին, ներկայացվելու է նաև վրացերեն լեզվով:
Ֆիլմում Վրաստանի նախագահ Միխեիլ Սաակաշվիլիի դերը, որը մարմնավորել է ամերիկացի դերասան Էնդի Գարսիան, կարող է հնչյունավորել հենց ինքը` Սաակաշվիլին: Այս մասին հայտարարել է ֆիլմի վրացի համապրոդյուսեր Նիկա Ավալիանին:
Վերջինիս խոսքերով, ֆիլմը նկարահանել է ռեժիսոր Ռեննի Հառլինը, ֆիլմը վրացական կինոթատրոնների էկրանին կհայտնվի հունիսի սկզբին: Հառլինը ցանկություն է հայտնել ներկա գտնվելու Թբիլիսիում ֆիլմի շնորհանդեսին:
Ֆիլմն արդեն ցուցադրվել է Վենետիկի ու Կաննի կինոփառատոներում, սակայն չի նշվում, թե այն ինչպիսի հաջողություն է ունեցել և թե ինչպիսին են եղել քննադատների գնահատականները:
Վրացական ընդդիմության կարծիքով, այս ֆիլմը Սաակաշվիլիին անհրաժեշտ է իր միջազգային քաղաքական PR-ի և տվյալ պատերազմում իր գործողություններն արդարացնելու համար, որոնք աղետալի հետևանքներ ունեցան Վրաստանի համար:
Հիշեցնենք, որ ֆիլմի նկարահանման աշխատանքները մեկնարկել են 2009 թվականի հոկտեմբերին, Թբիլիսիում: Դրան աջակցել են վրացական քաղաքական ու ռազմական իշխանությունները` տրամադրելով ռազմական հանդերձանք, տանկեր ու ուղղաթիռներ: Ֆիլմի բյուջեն կազմում է 50 միլիոն ամերիկյան դոլար:
