«Օրենքը կա, և 907 բանաձևն էլ փաստաթղթի վրա գործում է, բայց այն չի գործում, քանզի 2001թ. սեպտեմբերի 11-ի ահաբեկչությունից հետո այդ օրենքին չենթարկվելու իրավունք է տրվել ԱՄՆ նախագահին»,- անդրադառնալով ՀԱԿ ներկայացուցիչ Դավիթ Շահնազարյանի այն հայտարարությանը, թե պետք է ԱՄՆ լոբբիստական հայկական կազմակերպություններին մոբիլիզացնել, որպեսզի դարձյալ կյանքի կոչվի 1992թ. ընդունված ԱՄՆ Սենատի`«Ազատության աջակցության ակտի» թիվ 907 բանաձևը, «Առաջին լրատվականի» հետ զրույցում կարծիք հայտնեց ՀՅԴ հայ դատի և քաղաքական գրասենյակի ղեկավար Կիրո Մանոյանը:
Նշենք, որ այդ բանաձևով ԱՄՆ-ին արգելվում է տնտեսական օգնություն ցուցաբերել Ադրբեջանին, քանի դեռ ԱՄՆ նախագահը մասնավորապես չի զեկուցել ԱՄՆ Կոնգրեսին, որ Ադրբեջանը հրաժարվել է ուժի կիրառումից ԼՂ-ի և Հայաստանի նկատմամբ և պարտավորվել է ԼՂ խնդիրը լուծել խաղաղ ճանապարհով:
Մանոյանը նկատեց, որ ԱՄՆ-ում հայկական լոբբիստական կազմակերպությունները միայն կարողանում են այնպես անել, որ Հայաստանին և Ադրբեջանին տրամադրվելիք օժանդակությունը հավասարաչափ լինի, իսկ 907 բանաձևի առումով ոչ մի քայլ չեն կարող անել: