Կառավարության շենքի առաջ բանակում խաղաղ պայմաններում զոհվածների ծնողերին այսօր միացել էր «Զինվորի մայր» ՀԿ-ի նախագահ Մարգարիտա Խաչատրյանը:
Վերջինիս խոսքերով՝ իրեն զայրացրել է այն, որ զինդատախազ Գևորգ Կոստանյանը որոշել է խորհուրդ ստեղծել և ուսումնասիրել կասկածելի հանգամանքներում զոհված զինծառայողների մահվան դեպքերը, որոնք մահացել են միայն իր պաշտոնավարման ժամանակաշրջանում:
«Առաջին լրատվական»-ի հետ զրույցում Մ․ Խաչատրյանը (Մառոզ Մարգո) նշեց, որ իր որդու մահվան դեպքը մինչ օրս չի բացահայտվել և այն տեղի է ունեցել շատ ավելի վաղ: Իր իսկ խոսքերով՝ եկել էր ներողություն խնդրեր այն զինծառայողների մայրերից, ում խոստացել էր, որ իրենց զավակների մահվան դեպքերը կբացահայտվեն, սակայն այդպես չի եղել։ «Ես հայտարարում եմ՝ ոչ մի զինվորի մահվան դեպք չի բացահայտվելու, ամբողջը կոծկում են, եկել եմ միանամ ձեզ։ Ինձ հարցնում են՝ ինչո՞ւ չեք միանում սևազգեստ մայրերին, եկել եմ միանամ և ներողություն խնդրեմ, որ չկարողացա օգնել, Նանային էի խոստացել, որ կբացահայտվի իր տղայի մահվան իրական հանգամանքները, բայց այսօր ես չեմ կարող նրա երեսին նայել»,- հայտարարեց նա:
Մինչդեռ Մ․ Խաչատրյանի ներկայությունը կառավարութան շենքի դիմաց հարուցեց բանակում խաղաղ պայմաններում զոհված զինծառայողների ծնողներ Գոհար Օհանջանյանի, Նանա Մուրադյանի, Իրինա Ղազարյանի զայրույթը:
Տիկին Նանան հարցադրում արեց, թե ինչու այն ժամանակ Մարգարիտա Խաչատրյանը չթույլատրեց իր որդու դին բերել կառավարության շենքի առաջ դնել և պահանջել, որ ճիշտն ասեն, սպանությունը որպես ինքնասպանություն չներկայացնեն, ինչո՞ւ Մ․ Խաչատրյանը երդվեց «իր սև շորերի արևով», որ կբացահայտվեն իր որդու մահվան հանգամանքները, ինչին ի պատասխան Մ․ Խաչատրյանն ասաց. «Այո՛, ասել եմ, բայց չեմ կարողացել հասնել դրան, որովհետև թույլ չեն տալիս, որովհետև քննիչը կգա մեր տուն, կասի «ինչո՞ւ ես գնում-կանգնում կառավարության շենքի դիմաց, ինչո՞ւ գնացիր Լյուքս Ստեփանյանի հուղարկավորությանը մասնակցեցիր», չեմ կարողացել հասնել բացահայտման, իմ որդու մահվան իրական պատճառն էլ չեն բացահայտել»:
Տիգրան Օհանջանյանի մայրն էլ նրան հորդորեց ոչ թե գնալ զորամասեր, բացել կաթսաների կափարիչները և տեսնել, թե ինչ են ուտում զինվորները, այլ օգնել, որ վերջապես բացահայտվեն զինվորների մահվան իրական պատճառները:
