ՀՀՇ վարչության անդամ Գևորգ Գևորգյանը կարծում է, որ Ռոբերտ Քոչարյանը, հանդիպելով Իրանի նախագահի հատուկ բանագնաց, ԱԳ փոխնախարար Մոհամադռեզա Ռաուֆ Շեյբանի հետ, լուծում է իր հետագա քաղաքական ապաստանի խնդիրը:
«Հայաստանում իրադարձությունները Քոչարյանի նախատեսած սցենարով չեն ընթանում, և ընդհանրապես, Քոչարյանը հասկանում է, որ ՀՀ զարգացումներն իր վերահսկողությունից ալևս դուրս են: Եվ այդ ամենը տանում է նրան դատական պատասխանատվության: Օրինակ` եվրոպական կառույցների կողմից քննարկվում է մարտի 1-ին հրաման տվողների հարցը, մեր ժողովուրդն իր իրավունքների ու ազատությունների համար հետևողական պայքարով ապացուցում է, որ տեր է կանգնելու իր իրավունքներին ու ազատություններին, և որ ոչ մի քրեական իշխանություն չի կարող իրեն ետ պահել իր իրավունքները պաշտպանելու պայքարից: Քոչարյանը, տեսնելով այս ամենը, հասկացավ, որ ժամանակը և իրադարձությունների զարգացումը տանում են նրան, որ մարտի 1-ի համար պատասխանատվության օղակն ավելի ու ավելի է սեղմվում իր կոկորդին»,- ասաց Գևորգյանը:
Ըստ նրա` հիմա Քոչարյանը նման մարդկանց հետ է հանդիպում իր անձնական շահից ելնելով, ավելին՝ նա մշտապես այդպես է վարվել նաև իր իշխանավարման ժամանակ: «Նա տեսնում է, որ ՀՀ-ում ինքը քաղաքական գործիչ չէ, և հիմա հետաքրքրված է իր անվտանգության հարցով: Քոչարյանին ապահովության երաշխիք կարող էր երեկ տալ Լիբիան` Քադաֆիի գլխավորությամբ, այսօր` Իրանը` Ահմադինեժադի գլխավորությամբ»,- ասաց պարոն Գևորգյանը: Բացի այդ, նա համոզված է, որ Քոչարյանն այսպես փորձում է նաև խանգարել երկրի ներքաղաքական կայունության հաստատմանը: «Բայց նրա քաղաքական վերադարձը բացառվում է»,- ասաց Գևորգյանը: