Այսօր Ուկրաինայի մայրաքաղաք Կիևում սկսվում են բողոքի ակցիաներ, որոնք ստացել են «Ցասման օր» անվանումը: Այս մասին հաղորդում է այդ նախաձեռնության համակարգող Ալեքսանդր Դանիլյուկը` նշելով, որ այդ ակցիաներն անժամկետ են, և իրենք պահանջելու են գործող նախագահ Վիկտոր Յանուկովիչի հրաժարականը: Այս մասին հաղորդում է Rosbalt գործակալությունը:
Կազմակերպիչների խոսքերով, ակցիայի նպատակը իշխանության ոչ լեգիտիմության մասին բարձրաձայնելն է` նշելով, որ իրավական առումով այս իշխանությունն ապօրինի է, քանի որ դադարեցրել է 2004թ. սահմանադրական փոփոխությունների գործողությունը` կորցնելով հասարակական աջակցությունն ու հասարակական լեգիտիմությունը:
Ենթադրվում է, որ «Ցասման օրը» բաղկացած կլինի բազմաթիվ հանրահավաքների շարքից, որոնք տեղի կունենան ոչ միայն Կիևում, այլ նաև մարզկենտրոններում: