Ամբողջ աշխարհում մայիսի 18-ի նախորդող շաբաթ օրը, որը նշվում է որպես Թանգարանների միջազգային օրը, անցկացվում է «թանգարանային գիշեր», երբ առավոտյան բացվում են բոլոր թանգարանների դռները և փակվում միայն հաջորդ օրը:
Հայաստանում էլ են նշում այս օրը, սակայն մինչև կեսգիշեր դրանք բոլորը փակվում են:
Մայիսի 18-ի տոնը որոշվել է սահմանել 1977թ. Մոսկվայում կայացած Թանգարանների միջազգային խորհրդի գլխավոր կոնֆերանսի ժամանակ: Դեռ 1970-ականներին մայիս ամսին թանգարանները բացում էին իրենց դռներն անվճար այցելությունների համար, որը կոչվում էր «թանգարանների գարուն»: 1997թ. Բեռլինում տեղի ունեցավ մի ակցիա, որը կոչվեց «թանգարանների երկար գիշեր»: Այն անցկացվում էր հունվար և օգոստոս ամիսների վերջին շաբաթ օրը: Այդ օրերին Բեռլինի քաղաքային իշխանությունները ամբողջ գիշեր բաց էին թողնում քաղաքի թանգարանների դռները, ինչը մեծ ժողովրդականություն սկսեց վայելել, իսկ գերմանական 20 քաղաք միացավ այս միջոցառումներին:
Միջոցառման միջազգային տարածումը սկսվեց 2001թ.-ից, երբ Փարիզում առաջին անգամ նմանատիպ միջոցառում իրականացվեց` նվիրված Թանգարանների միջազգային օրվան: