Հուլիսի 2-ին, ժամը 17.00-ի սահմաններում, 1952 թ. ծնված Սեյրան Պողոսյանի վարած «ԳԱԶել» մակնիշի միկրոավտոբուսը Երևան-Վանաձոր ճանապարհի 66-րդ կմ-ին բախվել էր «ԶԻԼ-130» մակնիշի բեռնատարի հետ:
Պատահարի հետևանքով «ԳԱԶել»-ի վարորդը և ուղևորուհի, 1994 թ. ծնված Հայկանդուխտ Սիմոնյանը, տեղում մահացել էին, իսկ մյուս ուղևորներ Անուշիկ Սարիբեկյանը, Գուրգեն Զարգարյանը, Կարինե Աղումյանը, Թագուհի Աղումյանը, Հրաչ Բադալյանը, Էդիկ Բադալյանը, Կիմա Էդիտյանը, Նարեկ Մուրադյանը, Սվետլաննա Պապիկյանը, Ներսիկ Բորջիյանը, Ջուլիետա Մադաթյանը, Դավիթ Սարդարյանը և Ռ. Արշակյանը մարմնական վնասվածքներով տեղափոխվել էին հիվանդանոց, որտեղ ժամը 20.20-ին Դավիթ Սարդարյանը մահացել էր: Ավտոպատահարի հետևանքով մահացել է երեք, վիրավորվել՝ տասնվեց մարդ:
«Առաջին լրատվական»-ին ՀՀ ոստիկանության հասարակայնության հետ կապի և լրատվության բաժնից տեղեկացրեցին, որ հարուցվել է քրեական գործ ՀՀ քրեական օրենսգրքի 242 հոդվածի (Ճանապարհային երթևեկության և տրանսպորտային միջոցների շահագործման կանոնները խախտելը) երրորդ մասի (Սույն հոդվածի առաջին մասով նախատեսված արարքը, որն անզգուշությամբ առաջացրել է երկու կամ ավելի մարդու մահ՝ պատժվում է ազատազրկմամբ՝ 4-10 տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի) հատկանիշներով: Քրեական գործի շրջանակում նշանակվել է դիակների դատաբժշկական փորձաքննություն, իսկ վիրավորներին տրվել է դատաբժշկական ուղեգիր:
Լուսանկարը՝ shamshyan.com-ի
